കളമശേരി: വീട്ടിൽ അതിക്രമിച്ച് കയറി കാർപോർച്ചിൽ കിടന്ന കാർ, സ്കൂട്ടർ, ബുള്ളറ്റ് എന്നിവ തീവച്ച് നശിപ്പിച്ചതായി പരാതി. ഇന്നലെ ഉച്ചയ്ക്ക് ഒരു മണിയോടെയാണ് സംഭവം. പെരിങ്ങഴ എച്ച്.എം.ടി. കോളനിയിൽ വെളുത്തേടത്ത് വീട്ടിൽ ഇബ്രാഹിം ഉസ്മാന്റെ മകൻ മുഹമ്മദ് അനീസിന്റെ (28) വാഹനങ്ങൾ മൂവർസംഘം തീ കൊളുത്തിയെന്നാണ് പരാതി.

മുഹമ്മദ് അനീസ് എച്ച്.എം.ടി കോളനിയിൽ ഓൺലൈൻ സർവീസ് ആൻഡ് മൊബൈൽഷോപ്പ് കട നടത്തുകയാണ്. മൂവരും അനീസും തമ്മിൽ പൊലീസ് സ്റ്റേഷനിൽ പരാതി നൽകിയത് സംബന്ധിച്ച് നിലനിന്നിരുന്ന തർക്കം ഇന്നലെ സ്റ്റേഷനിൽവച്ച് പറഞ്ഞ് തീർത്തിരുന്നു. കത്ത് പിടിക്കുന്ന ഏതോ ദ്രാവകം ഒഴിച്ചശേഷമാണ് തീ കൊടുത്തതെന്നും അയൽവാസികളെത്തിയാണ് തീയണച്ചതെന്നും പരാതിയിൽ പറയുന്നു.