ആലുവ: ശ്രീനാരായണ ദർശനങ്ങൾ പ്രചരിപ്പിക്കുന്നതിനായി രൂപീകൃതമായ ആലുവ തിരുനാരായണ സത്സംഗത്തിന്റെ മൂന്നാമത് വാർഷികം ആഗസ്റ്റ് 15ന് ആലുവ അദ്വൈതാശ്രമത്തിൽ വിവിധ പരിപാടികളോടെ നടക്കുമെന്ന് ചെയർമാൻ ടി.ആർ. ബാബു, കൺവീനർ കെ.വി. രാജൻ, ട്രഷറർ എ.എൻ. രാജൻ എന്നിവർ അറിയിച്ചു.

രാവിലെ 10ന് എസ്.എൻ.ഡി.പി യോഗം ആലുവ യൂണിയൻ പ്രസിഡന്റ് വി. സന്തോഷ് ബാബു ഉദ്ഘാടനം ചെയ്യും. അദ്വൈതാശ്രമം സെക്രട്ടറി സ്വാമി ധർമ്മചൈതന്യ അനുഗ്രഹപ്രഭാഷണവും പുസ്തക പ്രകാശനവും നിർവഹിക്കും. എം.വി. പ്രതാപൻ പ്രഭാഷണം നടത്തും. ഗുരുദേവ കൃതികളെ കുറിച്ച് ആയിരക്കണക്കിന് വേദികളിൽ പ്രഭാഷണം നടത്തിയ അഡ്വ. ടി.ആർ. രാമനാഥനെയും 'കേരളകൗമുദി' ഏർപ്പെടുത്തിയ പത്രാധിപർ കെ. സുകുമാരൻ സ്മാരക മാദ്ധ്യമ അവാർഡ് നേടിയ കെ.സി. സ്മിജനെയും ആദരിക്കും. ആലുവ യൂണിയൻ സെക്രട്ടറി എ.എൻ. രാമചന്ദ്രൻ, ഗിരിജ രവി, ടി.യു. ലാലൻ എന്നിവർ സംസാരിക്കും.

ഉച്ചയ്ക്ക് രണ്ടിന് വാർഷിക സമ്മേളനം യൂണിയൻ വൈസ് പ്രസിഡന്റ് പി.ആർ. നിർമ്മൽകുമാർ ഉദ്ഘാടനം ചെയ്യും. വിവിധ മത്സരവിജയികൾക്കുള്ള സമ്മാനദാനം മുൻ യൂണിയൻ സെക്രട്ടറി കെ.എൻ. ദിവാകരൻ നിർവഹിക്കും.