ആലുവ: ജില്ലാ ലൈബ്രറി കൗൺസിൽ വികസന സമിതി സംഘടിപ്പിക്കുന്ന ത്രിദിന പുസ്തകോത്സവം ആലുവ യു.സി കോളേജിൽ ആരംഭിച്ചു. കാലടി സംസ്കൃത സർവകലാശാല വൈസ് ചാൻസലർ ഡോ. എം.വി. നാരായണൻ ഉദ്ഘാടനം ചെയ്തു. ജില്ലാ ലൈബ്രറി കൗൺസിൽ ജോയിന്റ് സെക്രട്ടറി കെ.പി. രാമചന്ദ്രൻ അദ്ധ്യക്ഷത വഹിച്ചു. സ്വാതന്ത്ര്യത്തിന്റെ 75 വർഷങ്ങൾ എന്ന വിഷയത്തിൽ സംസ്ഥാന ലൈബ്രറി കൗൺസിൽ പ്രസിഡന്റ് ഡോ. കെ വി. കുഞ്ഞിക്കൃഷ്ണൻ മുഖ്യപ്രഭാഷണം നടത്തി. മുൻ എം.എൽ.എ ജോൺ ഫെർണാണ്ടസ് ചിത്രമെഴുത്ത് ഉദ്ഘാടനം ചെയ്തു. ജില്ലാ ലൈബ്രറി കൗൺസിൽ പ്രസിഡന്റ് പി.കെ.സോമൻ, സെക്രട്ടറി എം.ആർ. സുരേന്ദ്രൻ, യു.സി കോളേജ് പ്രിൻസിപ്പൽ ഡോ. എം.ഐ. പുന്നൂസ്, എസ്.എ.എം. കമാൽ, കെ. രവിക്കുട്ടൻ എന്നിവർ സംസാരിച്ചു. എ.സി ഗോവിന്ദന്റെ സമ്പൂർണ കൃതികൾ, ജോൺ ഫെർണാണ്ടസിന്റെ വൃത്തം പതിനൊന്ന് കോൽ, എം.പി.ജോസഫിന്റെ ബാലകവിതാ സമാഹാരം എന്നീ പുസ്തകങ്ങൾ പ്രകാശിപ്പിച്ചു. ഡിസി, കറന്റ്, എൻ.ബി.എസ്, ഭാഷാ ഇൻസ്റ്റിറ്റ്യൂട്ട്, ബുക്ക് മാർക്ക്, യെസ് മലയാളം, സമത തുടങ്ങി 70 പ്രസാധകരുടെ 130 സ്റ്റാളുകൾ ഒരുക്കിയിട്ടുണ്ട്. പുസ്തകോത്സവത്തിന്റെ രണ്ടാം ദിവസമായ ഇന്ന് രാവിലെ 10ന് ലൈബ്രേറിയൻ സംഗമം, കവിതയും കഥാപാത്രവും, ഭരണഘടനയുടെ ദർശനം എന്നീ പരിപാടികൾ ഉണ്ടാകും. കവി ഡോ. രാവുണ്ണി പങ്കെടുക്കും. നാളെ നടക്കുന്ന സമാപന സമ്മേളനം മന്ത്രി പി. രാജീവ് ഉദ്ഘാടനം ചെയ്യും.