ആലുവ: ആർ.എസ്.പി ജില്ലാ സമ്മേളനം നാളെയും മറ്റെന്നാളുമായി തോട്ടുമുഖം വൈ.എം.സി.എയിൽ നടക്കുമെന്ന് സ്വാഗതസംഘം ചെയർമാൻ കെ. റെജികുമാർ, ജില്ലാ സെക്രട്ടറി ജോർജ് സ്റ്റീഫൻ എന്നിവർ വാർത്താസമ്മേളനത്തിൽ അറിയിച്ചു.

നാളെ രാവിലെ പത്തിന് മണ്ഡലം സെക്രട്ടറി ജി.വിജയൻ പതാക ഉയർത്തും. കേന്ദ്ര കമ്മിറ്റി അംഗം വി.ശ്രീകുമാരൻ നായർ ഉദ്ഘാടനം ചെയ്യും. ഉച്ചയ്ക്ക് രണ്ടിന് 'ഭരണഘടന: പ്രതീക്ഷയും പ്രതിസന്ധിയും' എന്ന വിഷയത്തിലെ സിംപോസിയം സംസ്ഥാന സെക്രട്ടറിയേറ്റ് അംഗം പി.ജി. പ്രസന്നകുമാർ ഉദ്ഘാടനം ചെയ്യും.

27ന് രാവിലെ പത്തിന് പ്രതിനിധി സമ്മേളനം സംസ്ഥാന സെക്രട്ടറി എ.എ. അസീസ് ഉദ്ഘാടനം ചെയ്യും. കേന്ദ്ര സെക്രട്ടറിയേറ്റ് അംഗം ബാബു ദിവാകരൻ അദ്ധ്യക്ഷത വഹിക്കും. 10.30ന് 'കേരള സർക്കാരിന്റെ ധനധൂർത്തും ഇടതുപക്ഷ നയവ്യതിയാനവും' എന്ന സെമിനാർ പ്രതിപക്ഷ നേതാവ് വി.ഡി. സതീശൻ ഉദ്ഘാടനം ചെയ്യും. എൻ.കെ. പ്രേമചന്ദ്രൻ എം.പി അദ്ധ്യക്ഷത വഹിക്കും. വൈകിട്ട് 5.15ന് സമാപന സമ്മേളനം കേന്ദ്ര സെക്രട്ടറിയേറ്റ് അംഗം ഷിബു ബേബി ജോൺ ഉദ്ഘാടനം ചെയ്യും. 14 മണ്ഡലം കമ്മിറ്റികളിൽ നിന്നായി തിരഞ്ഞെടുക്കപ്പെട്ട 215 പ്രതിനിധികൾ സമ്മേളനത്തിൽ സംബന്ധിക്കും. 31 അംഗ ജില്ലാ കമ്മിറ്റിയെയും 41 അംഗ സംസ്ഥാന സമ്മേളന പ്രതിനിധികളെയും സമ്മേളനം തിരഞ്ഞെടുക്കും.

ജില്ലാ നേതാക്കളായ വി.വി. മോഹനൻ, എസ്. ജലാലുദ്ദീൻ, എം.കെ.എ.അസീസ്, കെ.ടി.വിമലൻ, സുനിത ഡിക്സൺ, ജി.വിജയൻ എന്നിവരും വാർത്താ സമ്മേളനത്തിൽ പങ്കെടുത്തു.