പറവൂർ: എസ്.എൻ.ഡി.പി യോഗം പറവൂർ യൂണിയന്റെ ആഭിമുഖ്യത്തിൽ ശ്രീനാരായണഗുരുദേവന്റെ 168-ാം ജയന്തിയാഘോഷങ്ങളുടെ ഭാഗമായുള്ള ശ്രീനാരായണ ദിവ്യജ്യോതി പര്യടനത്തിന്റെ ഉദ്ഘാടനം നാളെ നടക്കും. ഗുരുദേവൻ ജ്വലിപ്പിച്ച ആലുവ അദ്വൈതാശ്രമത്തിലെ കെടാവിളക്കിൽ നിന്ന് ഉച്ചയ്ക്ക് രണ്ടിന് ആശ്രമം സെക്രട്ടറി സ്വാമി ധർമ്മചൈതന്യ ദിവ്യജ്യോതി തെളിച്ച് യൂണിയൻ പ്രസിഡന്റ് സി.എൻ. രാധാകൃഷ്ണന് നൽകും. യൂണിയൻ പ്രസിഡന്റ് ദിവ്യജ്യോതി പിന്നീട് യൂത്ത് മൂവ്മെന്റ് ചെയർമാൻ അഡ്വ. പ്രവീൺ തങ്കപ്പന് കൈമാറും. ശ്രീനാരായണ ദിവ്യജ്യോതിയുമായി നിരവധി യൂത്ത്മൂവ്മെന്റ് അത്‌ലറ്റുകൾ നൂറുകണക്കിന് ഇരുചക്രവാഹനങ്ങളുടെ അകമ്പടിയോടെ വിവിധ ശാഖകൾ നൽകുന്ന സ്വീകരണങ്ങൾ ഏറ്റുവാങ്ങി മുനിസിപ്പൽ കവലയിൽ എത്തിച്ചേരും. സെക്രട്ടറി ഹരി വിജയന്റെ നേതൃത്വത്തിൽ യൂണിയൻ, യൂണിയൻ പോഷകസംഘടന, ശാഖായോഗം, ശാഖാ പോഷകസംഘടനാ ഭാരവാഹികളും ചേർന്ന് സ്വീകരിക്കും. തുടർന്ന് വിവിധ വാദ്യമേളങ്ങളുടെ അകമ്പടിയിൽ യൂണിയൻ ഓഡിറ്റോറിയത്തിലേയ്ക്ക് ആനയിക്കും.
5.30ന് ജ്യോതിപര്യടന സമ്മേളനം എസ്.എൻ.ഡി.പി യോഗം വൈസ് പ്രസിഡന്റ് തുഷാർ വെള്ളാപ്പള്ളി ഉദ്ഘാടനം ചെയ്യും. യൂണിയൻ പ്രസിഡന്റ് സി.എൻ.രാധാകൃഷ്ണൻ അദ്ധ്യക്ഷത വഹിക്കും. സ്വാമി ധർമ്മചൈതന്യ അനുഗ്രഹപ്രഭാഷണം നടത്തും. മേഖലാതല മത്സരങ്ങളുടെ സമ്മാന വിതരണവും വിദ്യാഭ്യാസ സ്കോളർഷിപ്പ് വിതരണവും കേന്ദ്ര വനിതാസംഘം വൈസ് പ്രസിഡന്റും യോഗം കൗൺസിലറുമായ ഇ.എസ്. ഷീബ ടീച്ചർ നിർവഹിക്കും. യൂണിയൻ സെക്രട്ടറി ഹരി വിജയൻ, വൈസ് പ്രസിഡന്റ് ഷൈജു മനയ്ക്കപ്പടി, യോഗം ഇൻസ്പെക്ടിംഗ് ഓഫീസർ ഡി. ബാബു, യൂണിയൻ കൗൺസിലർമാരായ ടി.എം.ദിലീപ്, കണ്ണൻ കൂട്ടുകാട്, ടി.പി.കൃഷ്ണൻ, വി.പി.ഷാജി, എംപ്ളോയീസ് ഫോറം യൂണിയൻ സമിതി ചെയർമാൻ എം.ആർ.സുദർശനൻ, വൈദിക യോഗം യൂണിയൻ സമിതി പ്രസിഡന്റ് ജിജീഷ് ശാന്തി,
യൂണിയൻ പഞ്ചായത്ത് കമ്മിറ്റി അംഗം രാഗം സുമേഷ്, വനിതാ സംഘം യൂണിയൻ സമിതി സെക്രട്ടറി ബിന്ദു ബോസ് തുടങ്ങിയവർ സംസാരിക്കും.
യൂണിയന് കീഴിലെ 72 ശാഖായോഗങ്ങളിലും സെപ്തംബർ ഒന്ന് മുതൽ അഞ്ചുവരെ പര്യടനം നടത്തും. ഓരോ ദിവസവും നൂറുകണക്കിന് കേന്ദ്രങ്ങളിൽ ശ്രീനാരായണ ദിവ്യജ്യോതിക്ക് സ്വീകരണം നൽകും.