ന്യൂഡൽഹി: കോടികൾ ശമ്പളം കിട്ടിയാലെന്തേ വിദ്യാർത്ഥികൾക്ക് പുളിക്കുമോ? ജോലിയുടെയും ശമ്പളത്തിന്റെയും കാര്യത്തിലിനി ഐ.ഐ.ടി വിദ്യാർത്ഥികൾക്ക് ടെൻഷൻ വേണ്ട. കാമ്പസ് പ്ലെയ്‌സ്‌മെന്റ് സമയത്തെ ഏറ്റവും ഉയർന്ന തൊഴിലവസരങ്ങളാണ് മദ്രാസ് ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്‌നോളജി ഈ അദ്ധ്യയന വർഷത്തിൽ രേഖപ്പെടുത്തിയിരിക്കുന്നത്.

രജിസ്റ്റർ ചെയ്ത 80 ശതമാനം വിദ്യാർത്ഥികൾക്കും ജോലി കിട്ടിക്കഴിഞ്ഞു. കാമ്പസ് പ്ലെയ്‌സ്‌മെന്റിന്റെ ഒന്നും രണ്ടും ഘട്ടങ്ങളിൽ തന്നെ 380 കമ്പനികളിൽ നിന്നും 1,199 തൊഴിലവസരങ്ങളും സമ്മർ ഇന്റേൺഷിപ്പിൽ നിന്ന് 231 പ്രീ-പ്ലെയ്‌സ്‌മെന്റ് അവസരങ്ങളും ഐ.ഐ.ടി വിദ്യാർത്ഥികൾക്ക് ലഭിച്ചു കഴിഞ്ഞു. തൊഴിൽ അവസരങ്ങളുടെ എണ്ണം 1,430 ആയി വർദ്ധിച്ചുകഴിഞ്ഞു. ഇത് 2018-19 അദ്ധ്യയന വർഷത്തിൽ രേഖപ്പെടുത്തിയ 1,151 എന്ന ഏറ്റവും ഉയർന്ന നിരക്കിനേക്കാൾ വളരെ കൂടുതലാണ്.14 കമ്പനികളിൽ നിന്നായി 45 അന്താരാഷ്ട്ര തലത്തിലുള്ള അവസരങ്ങളും ഈ കണക്കിൽ ഉൾപ്പെടുന്നുണ്ട്. 199 ഓഫറുകളുമായി 131 സ്റ്റാർട്ടപ്പുകൾ ഈ വർഷം കാമ്പസ് പ്ലേസ്‌മെന്റിന്റെ ഭാഗമായി. 2021-22 കാമ്പസ് പ്ലെയ്‌സ്‌മെന്റ് സമയത്ത് വിദ്യാർത്ഥികൾക്ക് ലഭിക്കുന്നത് പ്രതിവർഷം 21.48 ലക്ഷം രൂപയാണ്. ഏറ്റവും ഉയർന്ന ശമ്പളമോ 250,000 യു.എസ് ഡോളർ അതായത് ഏകദേശം 1.98 കോടി രൂപ. .

 ഒരു അക്കാദമിക് സ്ഥാപനത്തിലെ വിദ്യാർത്ഥികളുടെ മികവ് കണക്കാക്കാവുന്ന ഫലമാണ് പ്ലേസ്‌മെന്റുകൾ പ്രതിഫലിപ്പിക്കുന്നത്. 2021-22 പ്ലെയ്‌സ്‌മെന്റുകളിൽ വിദ്യാർത്ഥികൾ മികച്ച പ്രകടനം കാഴ്ചവെച്ചതിൽ സന്തോഷമുണ്ടെന്ന് മദ്രാസ് ഐഐടി ഔട്ട്ഗോയിംഗ് അഡ്വൈസർ പ്രൊഫസർ സി.എസ്.ശങ്കർ റാം പറഞ്ഞു.