വണ്ടിപ്പെരിയാർ: കൃഷി വകുപ്പിന്റെ കീഴിൽ വണ്ടിപ്പെരിയാറിൽ പ്രവർത്തിക്കുന്ന സ്റ്റേറ്റ് വെജിറ്റബിൾ ഫാമിൽ പുതുതായി ആരംഭിക്കുന്ന കൂൺ കൃഷിയുടെ ഉദ്ഘാടനം വാഴൂർ സോമൻ എം.എൽ.എ. നിർവ്വഹിച്ചു. സംസ്ഥാന കൃഷി വകുപ്പിന് കീഴിൽ പ്രവർത്തിച്ചു വരുന്ന വണ്ടിപ്പെരിയാർ വെജിറ്റബിൾ ഫാമിലാണ് പച്ചക്കറി ഉത്പാദനത്തോടൊപ്പം സംയോജിത കൃഷികളും ആരംഭിക്കുന്നത്. നിലവിൽ കുരുമുളക്, ഏലം കാപ്പി, പച്ചക്കറികൾ എന്നിവയുടെ കൃഷിയ്ക്ക് പുറമേ ഉദ്യാന സസ്യങ്ങളുടെ വൻശേഖരവും ഫാമിലുണ്ട്. സംയോജിത കൃഷിമാതൃകകളായ പശുവളർത്തൽ, കോഴി വളർത്തൽ, തേനീച്ച വളർത്തൽ, മത്സ്യക്കൃഷി എന്നിവയുമുണ്ട്. വെർമിക്കമ്പോസ്റ്റ്, ജീവാമൃതം, പഞ്ചഗവ്യം എന്നിവയുടെ ഉത്പാദനവും വിപണനവും നടക്കുന്നു. ഫാമിൽ കൃഷിക്കാർക്കും കൃഷി ഉദ്യോഗസ്ഥർക്കും പരിശീലനത്തിനായി വാങ്ങിയ എൽ.സി.ഡി പ്രൊജക്ടറിന്റെ ഉദ്ഘാടനവും എം.എൽ.എ നിർവ്വഹിച്ചു. പൊതു ജനങ്ങളുടെ സൗകര്യാർത്ഥം പണമിടപാടുകൾ ഡിജിറ്റലാക്കുന്നതിന്റെ ഭാഗമായി തയ്യാറാക്കിയ ക്യു.ആർ കോഡിന്റെ പ്രകാശനം ജില്ലാ പഞ്ചായത്ത് പ്രസിഡന്റ് ജിജി കെ. ഫിലിപ്പ് നിർവ്വഹിച്ചു. ജില്ലാ പഞ്ചായത്ത് പ്രസിഡന്റിന്റെ അദ്ധ്യക്ഷതയിൽ ചേർന്ന ചടങ്ങിൽ അഴുത ബ്ലോക്ക് പഞ്ചായത്ത് പ്രസിഡന്റ് പി.എം. നൗഷാദ്, ജില്ലാ പഞ്ചായത്ത് മെമ്പർ എസ്.പി. രാജേന്ദ്രൻ, ബ്ലോക്ക് പഞ്ചായത്ത് മെമ്പർ ഷാജി പൈനാടത്ത്, മുൻ ജില്ലാ പഞ്ചായത്ത് അംഗം അഡ്വ സിറിയക് തോമസ്, ഗ്രാമപഞ്ചായത്ത് മെമ്പർ പ്രിയങ്ക മഹേഷ്, സി.ഐ.ടി.യു നേതാവ് എസ്. രാജേന്ദ്രൻ,​ ഫാം സൂപ്രണ്ട് ആർ. വേണുഗോപാൽ, ബിനു ശങ്കർ എന്നിവർ സംസാരിച്ചു. തൊഴിലാളി പ്രതിനിധികൾ, ഫാം ജീവനക്കാർ എന്നിവർ പങ്കെടുത്തു.