ജില്ലാതല ഉദ്ഘാടനം ചെറുതോണിയിൽ

സർക്കാൻ എട്ട് ലക്ഷം രൂ അനുവദിച്ചു

ചെറുതോണി: ജില്ലാ രൂപീകരണത്തിന്റെ സുവർണ ജൂബിലി വർഷം കൂടിയായ ഈ വർഷം ഓണത്തോടനുബന്ധിച്ചുള്ള ടൂറിസം വാരാഘോഷം വിപുലമായ പരിപാടികളോടെ സെപ്തംബർ ആറു മുതൽ 12 വരെ ജില്ലയിൽ സംഘടിപ്പിക്കാൻ ജില്ലാ കളക്ടർ ഷീബ ജോർജിന്റെ അദ്ധ്യക്ഷതയിൽ ചേർന്ന ആലോചനാ യോഗത്തിൽ തീരുമാനിച്ചു.
കൊവിഡ് വ്യാപനത്തെത്തുടർന്ന് മുൻവർഷങ്ങളിൽ നടക്കാതിരുന്ന ഓണാഘോഷം ഇക്കുറി പൊതുജനങ്ങളെ പങ്കെടുപ്പിച്ച് ഉത്സവാഘോഷമാക്കി മാറ്റാനാണ് തീരുമാനം. ഓണം വാരാഘോഷത്തിനായി സംസ്ഥാന സർക്കാൻ എട്ട് ലക്ഷം രൂപ ജില്ലയ്ക്ക് അനുവദിച്ചതായി കളക്ടർ അറിയിച്ചു.
ജില്ലാതല ഉദ്ഘാടനം സെപ്തംബർ ആറിന് വിപുലമായ പരിപാടികളോടെ ചെറുതോണിയിൽ സംഘടിപ്പിക്കും. രാവിലെ പതാക ഉയർത്തുന്നതോടെ ആഘോഷപരിപാടിയ്ക്ക് തുടക്കമാകും. ഘോഷയാത്ര, നിശ്ചലദൃശ്യങ്ങൾ, സെമിനാർ, കലാപരിപാടികൾ, പൊതു സമ്മേളനം എന്നിവ ഉണ്ടാവും. തിരുവോണദിനം, ചതയദിനം എന്നിവ ഒഴികെയുള്ള തുടർന്നുള്ള ദിവസങ്ങളിൽ ജില്ലയിലെ എല്ലാ മണ്ഡലങ്ങളിലും ഓണാഘോഷ പരിപാടികൾ വിപുലമായി സംഘടിപ്പിക്കും.ജില്ലാ കളക്ടറുടെ ചേമ്പറിൽ കൂടിയ യോഗത്തിൽ ഡീൻ കുര്യാക്കോസ് എം.പി, എം. എം. മണി എം. എൽ. എ, ബ്ലോക്ക് പഞ്ചായത്ത് പ്രസിഡന്റ് രാജി ചന്ദ്രൻ, ജില്ലാ പഞ്ചായത്ത് മെമ്പർ കെ.ജി സത്യൻ, ജില്ലാ ആസൂത്രണ സമിതി ഉപാദ്ധ്യക്ഷൻ സി.വി വർഗീസ്, ഗ്രാമ പഞ്ചായത്ത് അംഗങ്ങളായ നൗഷാദ് ടി, നിമ്മി ജയൻ, വിവിധ രാഷ്ട്രീയ പാർട്ടി പ്രതിനിധികൾ, വ്യാപാരി അസോസിയേഷൻ പ്രതിനിധികൾ, ഡി.ടി.പി.സി. അടക്കമുള്ള വിവിധ വകുപ്പുകളിലെ ഉദ്യോഗസ്ഥർ എന്നിവർ പങ്കെടുത്തു.

നിയോജക സംഘാടക സമിതി

രൂപീകരണം ഇന്ന് മുതൽ

മുന്നൊരുക്കങ്ങൾക്കും സംഘാടനത്തിനുമായി മണ്ഡലങ്ങളിൽ ജനപ്രതിനിധികൾ, ഉദ്യോഗസ്ഥർ എന്നിവരെ ഉൾപ്പെടുത്തി സംഘാടക സമിതി രൂപീകരിക്കും. ആഘോഷപരിപാടികളുടെ വിശദാംശങ്ങളും പരിപാടികളുടെ വേദിയും നിയോജകമണ്ഡല തല സംഘാടക സമിതി ചേർന്ന് തീരുമാനിക്കും.
ആഗസ്ത് 19 ന് രാവിലെ തൊടുപുഴയിലും, വൈകിട്ട് നാലിന് ചെറുതോണിയിലും, 20 ന് ഉടുമ്പൻചോല, പീരുമേട് മണ്ഡലങ്ങളിലും സംഘാടക സമിതികൾ ചേരും. ജില്ലാ തല ഉദ്ഘാടന പരിപാടിക്കായി മൂന്ന് ലക്ഷവും മണ്ഡലങ്ങളിലെ പരിപാടികൾക്ക് ഒരു ലക്ഷം വീതവും ജില്ല ടൂറിസം പ്രൊമോഷൻ കൗൺസലിന് ഓണം വാരാഘോഷ പ്രവർത്തനങ്ങൾക്ക് ഒരു ലക്ഷവും അനുവദിക്കാൻ യോഗത്തിൽ തീരുമാനിച്ചു.