ഇടുക്കി: സംസ്ഥാന വനിതാ കമ്മിഷനും കട്ടപ്പന ഐ.സി.ഡി.എസും സംയുക്തമായി ജാഗ്രത സമിതി അംഗങ്ങൾക്കായി ബോധവത്കരണ സെമിനാർ സംഘടിപ്പിച്ചു. സ്ത്രീകൾക്കും കുട്ടികൾക്കുമെതിരെയുള്ള അതിക്രമങ്ങൾ തടയുകയാണ് ജാഗ്രത സമിതിയുടെ ലക്ഷ്യം. കാഞ്ചിയാർ സാംസ്‌കാരിക നിലയത്തിൽ നടന്ന സെമിനാർ വനിതാ കമ്മിഷൻ അംഗം ഷാഹിദാ കമാൽ ഉദ്ഘാടനം ചെയ്തു. കട്ടപ്പന ശിശു വികസന പദ്ധതി ഓഫിസർ രമ പി.കെ. അദ്ധ്യക്ഷത വഹിച്ചു. ജാഗ്രതാ സമിതിയുടെ പ്രസക്തി, വിവിധ പ്രശ്‌നങ്ങൾ, നിയമ വശങ്ങൾ, മുതലായ വിഷയങ്ങളിൽ വനിതാ കമ്മീഷൻ അംഗം ഷാഹിദാ കമാൽ ക്ലാസ് നയിച്ചു. ഉപ്പുതറ , അയ്യപ്പൻകോവിൽ ഗ്രാമപഞ്ചായത്തുകൾക്ക് രാവിലെയും കാഞ്ചിയാർ പഞ്ചായത്തിനും കട്ടപ്പന നഗരസഭയ്ക്കുമായി ഉച്ചകഴിഞ്ഞുമായി രണ്ട് വിഭാഗമായിട്ടാണ് സെമിനാർ സംഘടിപ്പിച്ചത്.