ഇടുക്കി: സപ്ലൈകോ ഓണം ഫെയറിന്റെ ജില്ലാ തല ഉദ്ഘാടനം നെടുംകണ്ടത്ത് ജലവിഭവ മന്ത്രി റോഷി അഗസ്റ്റിൻ നിർവഹിച്ചു. ഗുണനിലവാരമുള്ള ഉത്പ്പന്നങ്ങൾ മിതമായ വിലയിൽ എല്ലാവർക്കും ഗുണം ലഭിക്കത്തക്ക രീതിയിൽ ജനങ്ങളിലേയ്ക്ക് എത്തിയ്ക്കുന്നതിനായി ശ്രമകരമായ പ്രവർത്തനമാണ് സപ്ലൈകോ കേരളത്തിലുടനീളം നടത്തിവരുന്നത്.
പ്രളയവും കൊവിഡ് മഹാമാരിയും മൂലം കഴിഞ്ഞ രണ്ട് മൂന്ന് വർഷങ്ങളായി ഓണം അതിന്റെ പൂർണതയിൽ ആഘോഷിക്കാൻ മലയാളികൾക്ക് സാധിച്ചിരുന്നില്ല. കൊവിഡ് തീവ്രത കുറഞ്ഞതിന്റെ പശ്ചാത്തലത്തിൽ ഇത്തവണ സർക്കാർ തലത്തിൽ വിവിധ ആഘോഷ പരിപാടികൾക്കാണ് രൂപം നൽകിയിരിക്കുന്നതെന്ന് അദ്ദേഹം പറഞ്ഞു. ചടങ്ങിൽ നെടുങ്കണ്ടം പഞ്ചായത്ത് പ്രസിഡന്റ് ശോഭന വിജയൻ അദ്ധ്യക്ഷത വഹിച്ചു. സപ്ലൈക്കോ ഒരുക്കിയിരിക്കുന്ന 'സമൃദ്ധി' സ്‌പെഷ്യൽ ഓണക്കിറ്റിന്റെ ആദ്യ വിതരണവും മന്ത്രി ചടങ്ങിൽ നടത്തി. സെപ്തംബർ ഏഴ് വരെ നെടുങ്കണ്ടം പടിഞ്ഞാറേക്കവല പ്രൈവറ്റ് ബസ് സ്റ്റാൻഡിന് സമീപമുള്ള മഠത്താമുറി ബിൽഡിങ്ങിലാണ് ഫെയർ സംഘടിപ്പിക്കുന്നത്. ജില്ലാതല ഫെയറിനോട് ഒപ്പം തന്നെ ഇടുക്കിയിൽ അഞ്ച് നിയോജക മണ്ഡലങ്ങളിലും ഓണം ഫെയറുകൾ സംഘടിപ്പിച്ചിട്ടുണ്ട്. ഗുണനിലവാരമുള്ള ഭക്ഷ്യസാധനങ്ങൾ കൃത്യമായ അളവിലും തൂക്കത്തിലും മിതമായ വിലയ്ക്ക് ലഭ്യമാക്കി വിപണിയിലെ വിലവർദ്ധന പിടിച്ചുനിർത്തുന്നത് ലക്ഷ്യമാക്കിയാണ് സർക്കാർ സപ്ലൈകോയുടെ ആഭിമുഖ്യത്തിൽ സംസ്ഥാനത്തുടനീളം ഓണം ഫെയറുകൾ സംഘടിപ്പിച്ചിട്ടുള്ളത്. മേളയിൽ പഞ്ചായത്ത് അംഗം എം.എസ്. മഹേശ്വരൻ, സപ്ലൈകൊ റീജിയണൽ മാനേജർ എം. സുൾഫിക്കർ, ജില്ലാ സപ്ലൈ ഓഫീസർ കെ.പി. അനിൽകുമാർ തുടങ്ങിയവർ പങ്കെടുത്തു.