ആലക്കോട്: കനത്ത മഴയെത്തുടർന്നുണ്ടായ മലവെള്ളപ്പാച്ചിലിൽ മലയോരത്ത് വ്യാപകമായ നാശനഷ്ടം. ഇന്നലെ വൈകുന്നേരത്തോടെയുണ്ടായ മലവെള്ളപ്പാച്ചിലിൽ മണക്കടവ് -ചീക്കാട് റോഡ് തകർന്നു. മണ്ണിടിച്ചിലിനെത്തുടർന്ന് ഒഴുകിവന്ന കല്ലുകളും ചെളിമണ്ണും മൂലം റോഡിലുള്ള കലുങ്ക് അടഞ്ഞതിനെ ത്തുടർന്ന് റോഡിൽ കൂടി മലവെള്ളം കുത്തിയൊഴുകിയാണ് നാശനഷ്ടമുണ്ടായത്. വാഹനഗതാഗതം തടസ്സപ്പെട്ടതോടെ ചീക്കാട് മേഖല ഒറ്റപ്പെട്ടു. വിവരമറിഞ്ഞ് ഉദയഗിരി ഗ്രാമപഞ്ചായത്ത് പ്രസിഡന്റ് കെ. എസ് ചന്ദ്രശേഖരന്റെ നേതൃത്വത്തിൽ നാട്ടുകാർ രാത്രി വൈകിയും ഹിറ്റാച്ചിയുടെ സഹായത്തോടെ തടസ്സം നീക്കാനുള്ള ശ്രമം തുടർന്നു. വ്യാപകമായ കൃഷിനാശവുമുണ്ടായിട്ടുണ്ട്.