കണ്ണൂർ:മട്ടന്നൂർ തിരഞ്ഞെടുപ്പ് ഫലം പുറത്ത് വന്നതോടെ എൽ.ഡി.എഫിനെതിരെ ആഞ്ഞടിച്ച് പ്രതിപക്ഷ നേതാവ് വി.ഡി.സതീശൻ .തന്റെ ഫേസ് ബുക്ക് പോസ്റ്റിലൂടെയാണ് വി.ഡി.സതീശന്റെ പ്രതികരണം.അധികാരത്തിന്റെ ഹുങ്കിൽ എന്തും ചെയ്യാമെന്ന ധാർഷ്ട്യവും സ്വജനപക്ഷപാതവും ജനം തിരിച്ചറിഞ്ഞ് തുടങ്ങിയെന്ന് അദ്ദേഹം ഫേസ് ബുക്കിൽ കുറിച്ചു. എല്ലാവരും മാ​റ്റം ആഗ്രഹിക്കുന്നുണ്ട്. അതിന്റെ തുടക്കമാണ് സി.പി.എമ്മുകാർ കോട്ടയെന്ന് വിശേഷിപ്പിക്കുന്ന മട്ടന്നൂരിൽ കണ്ടത്. ഏത് കോട്ടയും പൊളിയും.മട്ടന്നൂരിൽ എൽ.ഡി.എഫിന് മൃഗീയ ആധിപത്യമുള്ള എട്ട് സീ​റ്റുകൾ യു.ഡി.എഫ് പിടിച്ചെടുത്തു. യു.ഡി.എഫിന്റെ സീ​റ്റ് ഇരട്ടിയായി.

ഒരു വാർഡ് നാല് വോട്ടിനാണ് പരാജയപ്പെട്ടത്. നാല് സീ​റ്റുകൾ കൂടി നേടിയിരുന്നെങ്കിൽ യു.ഡി.എഫ് നഗരസഭ ഭരിക്കുമായിരുന്നു. ചില സീ​റ്റുകളിൽ സി.പി.എം -ബി.ജെ.പി ധാരണയും എസ്.ഡി.പി.ഐ സഹായവും ഇല്ലായിരുന്നുവെങ്കിൽ മട്ടന്നൂരിൽ കഥ മാറിയേനെ.കേരളത്തിലെ യു.ഡി.എഫ് സുസജ്ജമാണെന്നതിന്റെ തെളിവ് കൂടിയാണ് മട്ടന്നൂർ. മികച്ച ആസൂത്രണവും ചിട്ടയായ തിരഞ്ഞെടുപ്പ് പ്രവർത്തനവും ഏകോപിപ്പിച്ച കണ്ണൂരിലെ യു.ഡി.എഫ് നേതാക്കളെ അഭിനന്ദിക്കുന്നു.ശക്തമായ രാഷ്ട്രീയ മത്സരത്തിലൂടെ സീ​റ്റ് ഇരട്ടിയാക്കിയ യു.ഡി.എഫ് പോരാളികളെയും മട്ടന്നൂരിലെ ജനാധിപത്യ വിശ്വാസികളെയും ഹൃദയത്തോട് ചേർത്ത് നിർത്തുന്നുന്നുവെന്നും അദ്ദേഹം ഫേസ് ബുക്കിൽ കുറിച്ചു.