തലശേരി: നഗരത്തിൽ മാരക മയക്കുമരുന്നായ എം.ഡി.എം.എയുമായി രണ്ടു യുവാക്കളെ തലശേരി ടൗൺ പൊലിസ് പിടികൂടി. തലശേരി ജോസ്ഗിരിയിലെ വളപ്പിച്ചികണ്ടി ഹൗസിൽ മുഹമ്മദ് ഷാലു (23), ചൊക്ലി മാനാർ ഹൗസിൽ നദീം ഫിറോസ് (24) എന്നിവരെയാണ് കായ്യത്ത് റോഡിൽ വാഹനപരിശോധനയ്ക്കിടെ സ്‌കൂട്ടറിൽ കടത്തുകയായിരുന്ന 1.330 ഗ്രാം എം.ഡി.എം.എയുമായി പൊലീസ് പിടികൂടിയത്. ഇവർ സ്വയം ഉപയോഗത്തിനും വിൽപനയ്ക്കുമായി മയക്കുമരുന്ന് കൊണ്ടുപോവുകയായിരുന്നുവെന്ന് പൊലീസ് പറഞ്ഞു. ടൗൺ പൊലീസ് ഇൻസ്‌പെക്ടർ സുനിൽകുമാർ, സീനിയർ സിവിൽ പൊലീസ് ഓഫീസർ പ്രകാശൻ, സിവിൽ പൊലീസ് ഓഫീസർമാരായ ഹിരൺ, സിഗിൻ, ഷിനോജ് എന്നിവർ പരിശോധനാ സംഘത്തിലുണ്ടായിരുന്നു.