തലശ്ശേരി: സി.പി.ഐ കണ്ണൂർ ജില്ലാ സമ്മേളനം ആഗസ്ത് 31, സെപ്തംബർ 1, 2 തീയതികളിൽ തലശ്ശേരിയിൽ നടക്കുമെന്ന് സംഘാടക സമിതി ഭാരവാഹികൾ വാർത്താ സമ്മേളനത്തിൽ അറിയിച്ചു.
31ന് ഉച്ചയ്ക്ക് ഒന്നിന് പാറപ്രത്ത് നിന്ന് പതാക ജാഥയും 2.30ന് തലശ്ശേരി ജവഹർഘട്ടിൽ നിന്ന് കൊടിമരജാഥയും പുറപ്പെട്ട് സമ്മേളന നഗരിയിലെത്തിച്ചേരും. വൈകീട്ട് നാലിന് എ. ബാലകൃഷ്ണൻ നഗറിൽ (പുതിയ ബസ് സ്റ്റാൻ്ഡ്) നടക്കുന്ന പൊതുസമ്മേളനം ദേശീയ കൺട്രോൾ കമ്മീഷൻ ചെയർമാൻ പന്ന്യൻ രവീന്ദ്രൻ ഉദ്ഘാടനം ചെയ്യും. ജില്ലാ സെക്രട്ടറി അഡ്വ. പി. സന്തോഷ് കുമാർ എം.പി അദ്ധ്യക്ഷനാകും. സി.പി.ഐ മുൻജില്ലാ സെക്രട്ടറി സി. രവീന്ദ്രൻ പതാക ഉയർത്തും. സംസ്ഥാന അസി. സെക്രട്ടറിമാരായ അഡ്വ. കെ. പ്രകാശ് ബാബു, സത്യൻ മൊകേരി, റവന്യുമന്ത്രി കെ. രാജൻ, സംസ്ഥാന എക്സി. അംഗം സി.എൻ ചന്ദ്രൻ, സംസ്ഥാന കൺട്രോൾ കമ്മീഷൻ ചെയർമാൻ സി.പി മുരളി, കേരള മഹിളാസംഘം സംസ്ഥാന സെക്രട്ടറി അഡ്വ. വി.പി വസന്തം, സി.പി.ഐ സംസ്ഥാന കൗൺസിലംഗം സി.പി സന്തോഷ് കുമാർ, ജില്ലാ അസി. സെക്രട്ടറിമാരായ എ. പ്രദീപൻ, കെ.ടി ജോസ് എന്നിവർ പ്രസംഗിക്കും.
സ്വാഗതസംഘം ചെയർമാൻ സി.പി. ഷൈജൻ സ്വാഗതവും ജനറൽ കൺവീനർ അഡ്വ. എം.എസ്. നിഷാദ് നന്ദിയും പറയും. തുടർന്ന് കണ്ണൂർ സ്റ്റാർ വോയ്സിന്റെ നേതൃത്വത്തിൽ ചലച്ചിത്ര പിന്നണി ഗായിക പ്രിയ ബൈജു നയിക്കുന്ന ഗാനമേളയും യുവകലാസാഹിതി ജില്ല കമ്മറ്റി അംഗം തോമസ് കേളംകൂർ രചനയും ബിന്ദു വേണുഗോപാൽ സംവിധാനവും നിർവ്വഹിച്ച സംഗീതശില്പവും ഉണ്ടാകും. സെപ്തംബർ ഒന്നിന് കാലത്ത് ഒമ്പതരക്ക് പ്രദീപ് പുതുക്കുടി നഗറിൽ (ഓറിയ ഓഡിറ്റോറിയം എരഞ്ഞോളി ചുങ്കം) നടക്കുന്ന പ്രതിനിധി സമ്മേളനം സംസ്ഥാന സെക്രട്ടറി കാനം രാജേന്ദ്രൻ ഉദ്ഘാടനം ചെയ്യും. രണ്ടിന് പ്രതിനിധിസമ്മേളനം തുടരും.
വാർത്താസമ്മേളനത്തിൽ ജില്ലാ സെക്രട്ടരി പി. സന്തോഷ് കുമാർ എം.പി, സി.പി. ഷൈജൻ, എം.എസ്. നിഷാദ്, എം. ബാലൻ, പൊന്ന്യം കൃഷ്ണൻ സംബന്ധിച്ചു.