തലശ്ശേരി: സി.പി.ഐ കണ്ണൂർ ജില്ലാ സമ്മേളനത്തിന് ഇന്ന് തലശ്ശേരിയിൽ കൊടിയുയരും. ഉച്ചക്ക് ഒരു മണിക്ക് പാറപ്രത്ത് നിന്ന് പതാക ജാഥയും 2.30ന് തലശ്ശേരി ജവഹർഘട്ടിൽ നിന്ന് കൊടിമരജാഥയും പുറപ്പെട്ട് പൊതുസമ്മേളന നഗരിയായ പുതിയ ബസ് സ്റ്റാൻഡിൽ എത്തിച്ചേരും. എ.ഐ.വൈ.എഫ് ജില്ലാ സെക്രട്ടറി കെ.വി രജീഷ് ലീഡറും എ.ഐ.എസ്.എഫ് ജില്ലാ സെക്രട്ടറി പി.എ ഇസ്മയിൽ ഡെപ്യൂട്ടി ലീഡറുമായുള്ള പതാകജാഥയുടെ ഉദ്ഘാടനം ഇന്ന് ഉച്ചക്ക് ഒന്നിന് പാറപ്രത്ത് സംസ്ഥാന എക്സി.അംഗം സി.എൻ ചന്ദ്രൻ നിർവ്വഹിക്കും. കേരള മഹിളാ സംഘം സംസ്ഥാന ജോയിന്റ് സെക്രട്ടറി എൻ. ഉഷ പതാക ഏറ്റുവാങ്ങും. കിസാൻസഭ സംസ്ഥാന സെക്രട്ടറി എ. പ്രദീപൻ ലീഡറും ബി.കെ.എം.യു ജില്ലാ സെക്രട്ടറി കെ.വി ബാബു ഡെപ്യൂട്ടി ലീഡറുമായുള്ള കൊടിമര ജാഥ ഉച്ചക്ക് രണ്ടരക്ക് തലശ്ശേരി ജവഹർഘട്ടിൽ സംസ്ഥാന എക്സി.അംഗം സി.പി മുരളി ഉദ്ഘാടനം ചെയ്യും. എ.ഐ.ടി.യു.സി സംസ്ഥാന വൈസ് പ്രസിഡന്റ് താവം ബാലകൃഷ്ണൻ കൊടിമരം ഏറ്റുവാങ്ങും.
വൈകീട്ട് നാലിന് പൊതുസമ്മേളനം ദേശീയ കൺട്രോൾ കമ്മീഷൻ ചെയർമാൻ പന്ന്യൻ രവീന്ദ്രൻ ഉദ്ഘാടനം ചെയ്യും. ജില്ലാ സെക്രട്ടറി അഡ്വ. പി. സന്തോഷ് കുമാർ എം.പി അദ്ധ്യക്ഷനാകും. മുൻ ജില്ലാ സെക്രട്ടറി സി. രവീന്ദ്രൻ പതാക ഉയർത്തും. സെപ്തംബർ ഒന്നിന് കാലത്ത് ഒമ്പതരക്ക് എരഞ്ഞോളി ചുങ്കം ഓറിയ ഓഡിറ്റോറിയത്തിൽ നടക്കുന്ന പ്രതിനിധി സമ്മേളനം സംസ്ഥാന സെക്രട്ടറി കാനം രാജേന്ദ്രൻ ഉദ്ഘാടനം ചെയ്യും.