തലശ്ശേരി: സി.പി.ഐ കണ്ണൂർ ജില്ലാ സമ്മേളനത്തിന് ഉജ്ജ്വല തുടക്കം. മുൻ ജില്ലാ സെക്രട്ടറി സി. രവീന്ദ്രനാണ് പൊതുസമ്മേളന നഗരിയായ പുതിയ ബസ് സ്റ്റാൻഡിൽ പതാക ഉയർത്തിയത്. വിവിധ കേന്ദ്രങ്ങളിൽ നിന്നും പുറപ്പെട്ട പതാക കൊടിമര ജാഥകൾ സംഗമിച്ച് പൊതുസമ്മേളന നഗരിയായ എ ബാലകൃഷ്ണൻ നഗരിയിൽ പ്രവേശിച്ചു. പതാക ജാഥ സംസ്ഥാന എക്‌സി. അംഗം സി.എൻ ചന്ദ്രൻ പാറപ്രത്ത് ഉദ്ഘാടനം ചെയ്തു.

കേരള മഹിളാ സംഘം സംസ്ഥാന ജോ.സെക്രട്ടറി എൻ.ഉഷ പതാക ഏറ്റുവാങ്ങി. തലശ്ശേരി ജവഹർ ഘട്ടിൽ നിന്നും സംസ്ഥാന എക്‌സി. അംഗം സി.പി മുരളി കൊടിമര ജാഥ ഉദ്ഘാടനം ചെയ്തു. എ.ഐ.ടി.യു.സി സംസ്ഥാന വൈസ് പ്രസിഡന്റ് താവം ബാലകൃഷ്ണൻ കൊടിമരം ഏറ്റുവാങ്ങി. പൊതുസമ്മേളനം ദേശീയ കൺട്രോൾ കമ്മീഷൻ ചെയർമാൻ പന്ന്യൻ രവീന്ദ്രൻ ഉദ്ഘാടനം ചെയ്തു. ജില്ലാ സെക്രട്ടറി അഡ്വ. പി. സന്തോഷ് കുമാർ എം.പി അദ്ധ്യക്ഷത വഹിച്ചു. സംസ്ഥാന അസി. സെക്രട്ടറിമാരായ അഡ്വ കെ പ്രകാശ് ബാബു, സത്യൻ മൊകേരി, റവന്യുമന്ത്രി കെ.രാജൻ, സംസ്ഥാന എക്‌സി.അംഗം സി .എൻ ചന്ദ്രൻ, സംസ്ഥാന കൺട്രോൾ കമ്മീഷൻ ചെയർമാൻ സി.പി മുരളി പ്രസംഗിച്ചു. ഇന്ന് രാവിലെ ഒമ്പതരക്ക് എരഞ്ഞോളി ചുങ്കത്തെ പ്രദീപ് പുതുക്കുടി നഗറിൽ നടക്കുന്ന പ്രതിനിധി സമ്മേളനം സി.പി.ഐ സംസ്ഥാന സെക്രട്ടറി കാനം രാജേന്ദ്രൻ ഉദ്ഘാടനം ചെയ്യും.