കോഴിക്കോട് : ചേളന്നൂർ ബ്ലോക്ക് പഞ്ചായത്ത് ആവിഷ്‌കരിച്ച ലക്ഷ്യ പദ്ധതി സംസ്ഥാനത്തിനാകെ മാതൃകയെന്ന് വനം മന്ത്രി എ.കെ. ശശീന്ദ്രൻ. പദ്ധതിയുടെ ഉദ്ഘാടനം നന്മണ്ട സാക്ഷരതാ ഭവനിൽ നിർവഹിക്കുകയായിരുന്നു അദ്ദേഹം.

ഇതുപോലുള്ള നൂതന ആശയങ്ങൾ എല്ലാ വിദ്യാലയങ്ങളിലേക്കും വ്യാപിപ്പിച്ചാൽ ശാസ്ത്ര ആഭിമുഖ്യമുള്ളവരായി പുതുതലമുറയെ മാറ്റാൻ സാധിക്കുമെന്നും അദ്ദേഹം പറഞ്ഞു. പൊതുജനങ്ങളുടെയും സ്‌കൂൾ വിദ്യാർത്ഥികളുടെയും നൂതനാശയങ്ങളും നിർമ്മിതികളും കണ്ടെത്തി പ്രോത്സാഹിപ്പിക്കുന്നതിനായുള്ള പദ്ധതിയാണ് 'ലക്ഷ്യ'. സംസ്ഥാനത്ത് തന്നെ ഒരു തദ്ദേശ സ്വയംഭരണ കേന്ദ്രത്തിന് കീഴിൽ ആരംഭിക്കുന്ന ആദ്യ ജനകീയ ശാസ്ത്ര പരിപോഷണ കേന്ദ്രമാണ് നന്മണ്ട സാക്ഷരത ഭവനിൽ ആരംഭിച്ചത്. ചേളന്നൂർ ബ്ലോക്ക് പഞ്ചായത്ത് 2021-22 വാർഷിക പദ്ധതിയിൽ ഉൾപ്പെടുത്തി 6.5 ലക്ഷം രൂപ ഉപയോഗപ്പെടുത്തിയാണ് കേന്ദ്രം യഥാർത്ഥ്യമാക്കിയത്.

വിവിധ മേഖലകളിൽ പുരസ്‌കാരങ്ങൾ നേടിയ ഡോ. എം.കെ. രവിവർമ്മ, ഡോ. അബ്ദുൾ നാസർ യു.കെ, ഷജിൻ യു.കെ. എന്നിവരെ മന്ത്രി ആദരിച്ചു. ചേളന്നൂർ ബ്ലോക്ക് പഞ്ചായത്ത് പ്രസിഡന്റ് കെ.പി. സുനിൽ കുമാർ അദ്ധ്യക്ഷത വഹിച്ചു. ലക്ഷ്യ ബ്രോഷർ പ്രകാശനം നന്മണ്ട ഗ്രാമപഞ്ചായത്ത് പ്രസിഡന്റ് കൃഷ്ണവേണി മാണിക്കോത്ത് നിർവഹിച്ചു. ഐ.എസ്.ആർ.ഒ മുൻ ഡയറക്ടർ ഇ.കെ കുട്ടി മുഖ്യപ്രഭാഷണം നടത്തി.

വിവിധ ഗ്രാമപഞ്ചായത്ത് പ്രസിഡന്റുമാരായ പി.പി. നൗഷീർ, കെ.ടി. പ്രമീള, ഷീബ കെ.പി, സി.എം. ഷാജി, ജനപ്രതിനിധികൾ, രാഷ്ട്രീയപാർട്ടി പ്രതിനിധികൾ, ഉദ്യോഗസ്ഥർ തുടങ്ങിയവർ പങ്കെടുത്തു. ബ്ലോക്ക് പഞ്ചായത്ത് ആരോഗ്യ വിദ്യാഭ്യാസ സ്റ്റാന്റിംഗ് കമ്മിറ്റി ചെയർമാൻ സർജാസ് കുനിയിൽ സ്വാഗതവും ബ്ലോക്ക് പഞ്ചായത്ത് ബി.ഡി.ഒ എ.ടി. മനോജ് കുമാർ നന്ദിയും പറഞ്ഞു.