കോഴിക്കോട് : ജില്ലയിലെ ആദ്യത്തെയും സംസ്ഥാനത്തെ രണ്ടാമത്തെയും പൂർണമായും സൗരോർജ്ജത്തിൽ പ്രവർത്തിക്കുന്ന സോളാർ ഇ.വി ചാർജിംഗ് സ്റ്റേഷന്റെ ഉദ്ഘാടനം പൊതുമരാമത്ത്, ടൂറിസം മന്ത്രി പി.എ മുഹമ്മദ് റിയാസ് ഇന്ന് ഉച്ചയ്ക്ക് രണ്ടിന് കൊടുവള്ളി വെണ്ണക്കാട് ഉള്ള റോയൽ ആർക്കയിഡ് കൺവെൻഷൻ സെന്ററിൽ നിർവഹിക്കും.
കുന്ദമംഗലം എം.എൽ.എ പി.ടി.എ റഹിം, കൊടുവള്ളി എം.എൽ.എ എം.കെ മുനീർ, അനെർട്ട് ചീഫ് എക്‌സിക്യൂട്ടീവ് ഓഫീസർ നരേന്ദ്രനാഥ് വെല്ലൂരി എന്നിവർ പങ്കെടുക്കുന്നതാണ്.
ഈ ചാർജിംഗ് സ്റ്റേഷനിൽ സ്ഥാപിച്ചിട്ടുള്ള 50 കിലോവാട്ട് സൗരോർജ്ജ സംവിധാനത്തിൽ നിന്നും ഒരു ദിവസം 200 യൂണിറ്റ് വൈദ്യുതി ലഭിക്കും. ഒരു കിലോവാട്ടിന് 20,000 രൂപ നിരക്കിൽ 50 കിലോവാട്ടിന് 10 ലക്ഷം രൂപയാണ് അനെർട്ട് സബ്‌സിഡി നൽകുന്ന പദ്ധതി പ്രകാരമാണ് ഈ സോളാർ പ്ലാന്റ് സ്ഥാപിച്ചത്.
ഒരേ സമയം 2 കാറുകൾ ചാർജ് ചെയ്യുന്നതിനുള്ള 142 കിലോവാട്ട് മെഷീൻ, 3 ഓട്ടോറിക്ഷകൾ ചാർജ് ചെയ്യുന്നതിനുമുള്ള 10 കിലോവാട്ട് മെഷീൻ കൂടാതെ ഇലക്ട്രിക് ബൈക്ക്, ഇലക്ട്രിക് സ്‌കൂട്ടർ എന്നിവ ചാർജ് ചെയ്യുന്നതിനുള്ള 7.5 കിലോവാട്ട് ശേഷിയുള്ള മെഷീൻ എന്നിവയാണ് ഈ ചാർജിംഗ് സ്റ്റേഷനിൽ സ്ഥാപിച്ചിട്ടുള്ളത്.