പാലാ : ഭരണങ്ങാനം അയ്യംങ്കോലിപ്പാറ കുടിവെള്ള പദ്ധതിയുടെ കിണറിന് സമീപം കക്കൂസ് മാലിന്യം തള്ളി. 350 ഓളം വീടുകളിലും നിരവധി സ്ഥാപനങ്ങളിലും 'ഭരണങ്ങാനം ടൗണിലെ വ്യാപാര സ്ഥാപനങ്ങളിലും കുടിവെള്ളം ലഭ്യമാക്കുന്നത് അയ്യങ്കോലിപാറ കുടിവെള്ള പദ്ധതിയിൽ നിന്നാണ്. ആറുമാസങ്ങൾക്ക് മുമ്പും ഇവിടെ മാലിന്യം തള്ളിയിരുന്നു. കിണറിന് സമീപമുള്ള സി.സി.ടി.വി കാമറ മാസങ്ങളായി പ്രവർത്തനരഹിതമായിട്ടും പഞ്ചായത്ത് അനാസ്ഥ തുടരുകയാണെന്ന് ജില്ലാ പഞ്ചായത്ത് മെമ്പർ രാജേഷ് വാളിപ്ലാക്കൽ പറഞ്ഞു. മാലിന്യം തള്ളിയ വിഷയത്തിൽ പൊലീസിൽ പരാതി പോലും നൽകാത്ത പഞ്ചായത്തിന്റെ നടപടി പ്രതിഷേധാർഹം ആണെന്നും അദ്ദേഹം പറഞ്ഞു. പഞ്ചായത്ത് അധികൃതരോ ആരോഗ്യ വിഭാഗമോ ഇതുവരെ സംഭവസ്ഥലം സന്ദർശിച്ചിട്ടില്ല. ജലം ജീവനാണ് എന്ന മുദ്രാവാക്യവുമായി ജലസാക്ഷരത ജാഥ ഭരണങ്ങാനം പഞ്ചായത്തിന്റെ വിവിധ വാർഡുകളിൽ കൂടി കടന്നുപോയ ദിവസം തന്നെയാണ് മാലിന്യം തള്ളിയത്.