കോട്ടയം. നിരന്തര കുറ്റവാളിയെ കാപ്പാ ചുമത്തിയ പൊലീസിന്റെ നടപടി സർക്കാർ ശരിവച്ചു. തെള്ളകം വലിയകാല കോളനി തടത്തിൽപറമ്പിൽ നാദിർഷയെയാണ് ജില്ലാ പൊലീസ് മേധാവി കെ.കാർത്തിക് സമർപ്പിച്ച റിപ്പോർട്ടിന്റെ അടിസ്ഥാനത്തിൽ കാപ്പാ നിയമപ്രകാരം കരുതൽ തടങ്കലിൽ അടച്ചത്. ഇതിനെ ശരിവച്ചാണ് സർക്കാർ ഉത്തരവിറക്കിയത്. കുറേ വർഷങ്ങളായി പാമ്പാടി, ഗാന്ധിനഗർ, ഏറ്റുമാനൂർ എന്നിവിടങ്ങളിലും എറണാകുളം ജില്ലയിലെ ഇൻഫോപാർക്ക്, മൂവാറ്റുപുഴ എന്നീ പൊലീസ് സ്റ്റേഷനുകളിലും വധശ്രമം, സംഘം ചേർന്ന് ആക്രമിക്കുക, ഭീഷണിപ്പെടുത്തുക, പിടിച്ചുപറിക്കുക തുടങ്ങിയ ക്രിമിനൽ കേസുകളിൽ പ്രതിയാണ്. ഇതേ തുടർന്നാണ് ഇയാൾക്കെതിരെ കാപ്പാ ചുമത്തണമെന്ന് പൊലീസ് റിപ്പോർട്ട് നൽകിയത്.