ഷെയ്ൻ നിഗം , ആന്റണി വർഗീസ്, നീരജ് മാധവ് എന്നിവരെ കേന്ദ്ര കഥാപാത്രങ്ങളാക്കി നവാഗതനായ നവാസ് ഹിദായത്ത് കഥ എഴുതി സംവിധാനം ചെയ്യുന്ന ആർഡി എക്സ് എന്ന ചിത്രത്തിൽ മഹിമ നമ്പ്യാരും, ഐമ റോസ്മിയും നായികമാർ. കാര്യസ്ഥൻ, മാസ്റ്റർപീസ്, മധുരരാജ എന്നീ ചിത്രങ്ങളിൽ അഭിനയിച്ച മഹിമനമ്പ്യാർ നിരവധി തമിഴ് സിനിമകളിൽ നായിക വേഷമിട്ടിട്ടുണ്ട്. ആദ്യമായാണ് മഹിമ മലയാളത്തിൽ നായികയാവുന്നത്. ജേക്കബിന്റെ സ്വർഗരാജ്യത്തിൽ നിവിൻ പോളിയുടെ സഹോദരിയായും മുന്തിരിവള്ളികൾ തളിർക്കുമ്പോൾ എന്ന ചിത്രത്തിൽ മോഹൻലാലിന്റെ മകളായും ഐമ റോസ് മി തിളങ്ങിയിട്ടുണ്ട്. ലാൽ സുപ്രധാന കഥാപാത്രത്തെ അവതരിപ്പിക്കുന്നു. ബൈജു സന്തോഷ്, ഷമ്മിതിലകൻ, മാല പാർവതി, നിഷാന്ത് സാഗർ എന്നിവരാണ് മറ്റു താരങ്ങൾ. തിരക്കഥ ഷബാസ് റഷീദ്, ആദർശ് സുകുമാരൻ. അലക്സ് പുളിക്കൽ ഛായാഗ്രഹണം നിർവഹിക്കുന്നു.പവർ ആക്ഷൻ എന്ന ടാഗ് ലൈനിൽ ഒരുങ്ങുന്ന ചിത്രത്തിന്റെ ആക്ഷൻ രംഗങ്ങൾ ഒരുക്കുന്നത് ദേശീയ അവാർഡ് ജേതാവായ അൻപ് അറിവാണ്. വൻ ബഡ്ജറ്റിൽ തൊണ്ണൂറുദിവസത്തെ ചിത്രീകണം ആണ് പ്ലാൻ ചെയ്യുന്നത്. ആഗസ്റ്റ് 17ന് കൊച്ചിയിൽ ചിത്രീകരണം ആരംഭിക്കും. വീക്കെൻഡ് ബ്ളോക് ബസ്റ്ററിന്റെ ബാനറിൽ സോഫിയ പോൾ ആണ് നിർമ്മാണം പി.ആർ.ഒ വാഴൂർ ജോസ്.