മത്സ്യവും മാംസവും അടങ്ങിയ വിഭവസമൃദ്ധമായ കൂട്ടുകറികളില്ലെങ്കിൽ ചോറ് കഴിക്കാത്ത മലയാളികൾക്കിനി കറികളില്ലാ എന്ന പേരിൽ ചോറ് മാറ്റി വയ്ക്കേണ്ടി വരില്ല. ഇനി വീട്ടിലൊരുക്കാം അടിപൊളി ഒരു എഗ്ഗ് ഫ്രൈഡ് റൈസ്. അതും വെറും മിനിറ്റുകൾക്കകം. കുട്ടികൾക്കും മുതിർന്നവർക്കും ഒരുപോലെ ഇഷ്ടപ്പെടുന്ന ഈ വിഭവം വളരെ എളുപ്പത്തിൽ വീടുകളിൽ നിത്യേന ഉണ്ടാകുന്ന സാധനങ്ങൾ കൊണ്ട് ഉണ്ടാക്കിയെടുക്കാം. അതുപോലെ വീടുകളിലെ ബാക്കി വരുന്ന ചോറ് കൊണ്ടും നമുക്കിത് ഉണ്ടാക്കിയെടുക്കാം.

ചേരുവകൾ

ചോറ് ( ആവശ്യം വേണ്ടത് )​

നെയ്യ് - 3 ടീസ്പൂൺ

കോഴിമുട്ട - 2 എണ്ണം

കടുക് - 1 ടീസ്പൂൺ

തക്കാളി - 1

സവാള - 1

കാബേജ് - ആവശ്യത്തിന്

കാരറ്റ് - 1

പച്ചമുളക് - 2

മല്ലിയില

ഉപ്പ്

കുരുമുളക് - 1 ടീസ്പൂൺ

കറിവേപ്പില

വെളുത്തുള്ളി - 2 അല്ലി

ഉണ്ടാക്കുന്ന വിധം

ഒരു പാനിൽ അൽപ്പം നെയ്യ് ഒഴിക്കുക. അതിൽ കടുക് ഇട്ട് പൊട്ടിയതിനു ശേഷം ചെറുതായി അരിഞ്ഞ വെളുത്തുള്ളി,​ കറിവേപ്പില എന്നിവ ഇട്ട് വഴറ്റുക. പിന്നീട് സവാള,​ പച്ചമുളക്,​ ചെറുതായി അരിഞ്ഞ തക്കാളി,​ കാബേജ്,​ കാരറ്റ് എന്നിവ ചേർത്ത് ഇളക്കാം. ശേഷം 2 കോഴിമുട്ട അതിലേക്ക് പൊട്ടിച്ച് ഒഴിച്ച് ഇളക്കി ആവശ്യത്തിന് ഉപ്പിടാം. അതിലേയ്ക്ക് വേവിച്ച് വെച്ച ചോറ് ഇട്ടുകൊടുത്ത് നെയ്യ്,​ കുരുമുളക് പൊടി,​ ചെറുതായി അരിഞ്ഞ പച്ചമുളക്,​ മല്ലിയില എന്നിവ ചേർത്ത് ഇളക്കാം. 2 മിനിറ്റ് നേരം മീഡിയം ഫ്ളെയിമിൽ മൂടിവെച്ച് വേവിച്ച ശേഷം സ്വാദിഷ്ടമായ എഗ്ഗ് ഫ്രൈഡ് റൈസ് ചൂടോടെ വിളമ്പാം.