തിരുവനന്തപുരം : സിവിക് ചന്ദ്രന് മുൻകൂർ ജാമ്യം നൽകിയ കോടതി ഉത്തരവിൽ അതി ജീവിതയ്ക്കെതിരെ നടത്തിയ പരാമർശം ആശങ്ക ഉയർത്തുന്നതാണെന്ന് സി.പി.എം വ്യക്തമാക്കിി. സംസ്ഥാന സെക്രട്ടറിയേറ്റ് പ്രസ്താവനയിൽ പറഞ്ഞു.
തങ്ങളുടെ മുന്നിൽ വരുന്ന വിഷയങ്ങളെ വിലയിരുത്തി ഉത്തരവ് നൽകുവാൻ കോടതിക്ക് അവകാശമുണ്ട്. എന്നാൽ ഈ കേസിൽ പരാതിക്കാരിയുടെ വസ്ത്ര ധാരണത്തെക്കുറിച്ച് നടത്തിയ കോടതിയുടെ പരാമർശം സുപ്രീം കോടതി മാർഗ നിർദ്ദേശങ്ങൾക്ക് കടകവിരുദ്ധമാണെന്ന് സി.പി.എം സംസ്ഥാന സെക്രട്ടേറിയറ്റ് പ്രസ്താവനയിൽ പറഞ്ഞു.

ഇത്തരം കേസുകളിൽ വിചാരണയിൽ കോടതി നടപടികളും അതിജീവിതക്ക് മാനസിക പ്രയാസങ്ങൾ ഉണ്ടാക്കുന്നതാകരുതെന്ന സുപ്രീം കോടതി നിർദ്ദേശത്തിന് തീർത്തും കടകവിരുദ്ധവുമാണിത്. പരാതിക്കാരിയെ പ്രതിയുടെ അഭിഭാഷകൻ ക്രോസ് വിസ്താരം നടത്തുമ്പോൾപോലും അവരെ അവഹേളിക്കുന്ന ചോദ്യങ്ങളോ, പരാമർശങ്ങളോ ഉണ്ടാകരുതെന്ന് സുപ്രീം കോടതി വ്യക്തമാക്കിയിരിക്കെയാണ് ഇത്തരമൊരു പരാമർശം ഉണ്ടായിരിക്കുന്നത്.
ഭരണഘടനയുടെ അനുച്ഛേദം 21 പ്രകാരം പൗരന് ഉറപ്പ് നൽകുന്ന വ്യക്തിസ്വാതന്ത്ര്യത്തിന് മേലുള്ള കടന്നുകയറ്റം കൂടിയാണ് വസ്ത്ര ധാരണത്തെ സംബന്ധിച്ചുള്ള കോടതി പരാമർശമെന്നും സെക്രട്ടറിയേറ്റ് പ്രസ്താവനയിൽ വ്യക്തമാക്കി.