സ്വന്തമായി കാർ വാങ്ങിയതിന്റെ സന്തോഷം അറിയിച്ചുകൊണ്ട് യുവാവ് സോഷ്യൽ മീഡിയയിൽ പങ്കുവച്ച കുറിപ്പാണ് ഇപ്പോൾ വൈറലായിക്കൊണ്ടിരിക്കുന്നത്. ലിങ്ക്‌ഡ് ഇന്നിലാണ് കാർ വാങ്ങാൻ സഹായിച്ച എല്ലാവർക്കും നന്ദി പറഞ്ഞുകൊണ്ട് യുവാവ് പോസ്റ്റിട്ടത്. സോഷ്യൽ മീഡിയ സ്ട്രാറ്റജിസ്റ്റായി ജോലി ചെയ്യുന്ന മഥുർ സിംഗ് എന്ന യുവാവിന്റെ കുറിപ്പാണ് വൈറലാകുന്നത്.
'ഞാനൊരു ടാറ്റ ടിയാഗോ സ്വന്തമാക്കിയ വിവരം വളരെ സന്തോഷത്തോടെ നിങ്ങളെ അറിയിക്കുകയാണ്. ലോണല്ല, ഫുൾ പേയ്മെന്റ് നൽകിയാണ് വാങ്ങിയിരിക്കുന്നത്. ഒരു കാര്‍ വാങ്ങുന്നതിനായി വര്‍ഷങ്ങളായി പണം കൂട്ടിവയ്ക്കുകയാണ് ഞാൻ. കൂട്ടുകാര്‍ക്കൊപ്പം പാര്‍ട്ടികള്‍ക്ക് പോകാറില്ല. കാമുകിക്കോ ഭാര്യക്കോ വിലകൂടിയ സമ്മാനങ്ങളും വാങ്ങി നല്‍കിയിട്ടില്ല. അമ്മ പച്ചക്കറി വാങ്ങാനായി വിട്ടാല്‍ പച്ചമുളകും മല്ലിയിലയുമൊക്കെ സൗജന്യമായി തരുമോ എന്ന് കടക്കാരനോട് ചോദിക്കുമായിരുന്നു. അങ്ങനെ കാര്‍ വാങ്ങുന്നതിനായി പത്ത് രൂപ ചേര്‍ത്ത് വയ്ക്കാമല്ലോ. രാത്രിയില്‍ വാച്ച്‌മാനായി അധിക ജോലിയെടുത്തു. ചില സമയങ്ങളില്‍ മക്ഡോണാള്‍ഡ്സില്‍ ജോലി ചെയ്തു. ചിലപ്പോള്‍ യുപിഎസ്ഇ പരീക്ഷയ്ക്ക് തയാറെടുക്കുന്നവര്‍ക്ക് ട്യൂഷന്‍ എടുത്തു. അങ്ങനെ ഇപ്പോൾ കാത്തിരിപ്പ് അവസാനിച്ചിരിക്കുകയാണ്. ഇതിന് സഹായിച്ച മാതാപിതാക്കൾ, ജോലി തന്നവർ, മുൻ കാമുകിമാർ, പുതിയ കാമുകിമാർ, പച്ചക്കറി കടക്കാർ എന്നിവർക്കും നന്ദി അറിയിക്കുന്നു.'- മഥുർ സിംഗ് കുറിച്ചു.
'താങ്കളുടെ ഭാര്യയ്ക്കും കാമുകിക്കും പരസ്പരം അറിയാമോ?' തുടങ്ങിയ നിരവധി കമന്റുകളാണ് വന്നുകൊണ്ടിരിക്കുന്നത്. പോസ്റ്റ് വൈറലായതിന് പിന്നാലെ സർക്കാസം ആയാണ് കുറിപ്പിട്ടതെന്ന് മഥുർ വ്യക്തമാക്കി.