ന്യൂഡൽഹി: വി.സി നിയമനത്തിനുള്ള സേർച്ച് കമ്മിറ്റി രൂപീകരിച്ചതിനെതിരെ കേരള സർവകലാശാല സെനറ്റ് പ്രമേയം പാസാക്കിയത് നല്ല കാര്യമെന്ന് ഗവർണർ ആരിഫ് മുഹമ്മദ് ഖാൻ പറഞ്ഞു. വിമർശനങ്ങളെ പൂർണ മനസോടെ സ്വാഗതം ചെയ്യുന്നതായി ഗവർണർ പറഞ്ഞു. വിമർശനത്തെ താൻ ഇഷ്ടപ്പെടുന്നു. വിമർശിക്കാനുള്ള ജനാധിപത്യ അവകാശങ്ങൾ ഉണ്ടാകണമെന്നും അദ്ദേഹം പറഞ്ഞു. പ്രമേയം പാസാക്കിയതിൽ നടപടിയെടുക്കില്ലെന്നും ഗവർണർ വ്യക്തമാക്കി.

താൻ നോമിനേറ്റ് ചെയ്തവർ പ്രമേയത്തിൽ ഒപ്പിട്ടെങ്കിലും അവർക്കെതിരെ പ്ലഷർ ക്ലോസ് ഉപയോഗിക്കില്ല. സർവകലാശാല പ്രതിനിധിയെ ഉൾപ്പെടുത്തിയില്ല എന്നതുകൊണ്ട് നടപടികൾ നിർത്തിവയ്ക്കാൻ ആകില്ല. എപ്പോൾ വേണമെങ്കിലും സർവകലാശാല പ്രതിനിധിക്ക് നടപടിക്രമങ്ങളുടെ ഭാഗമാകാമെന്നും ആരിഫ് മുഹമ്മദ് ഖാൻ കൂട്ടിച്ചേർത്തു.

വി.സി നിയമനത്തിനുള്ള ഗവർണറുടെ സേർച്ച് കമ്മിറ്റി നിയമവിരുദ്ധമാണെന്നും തീരുമാനം പിൻവലിക്കണമെന്നും ആവശ്യപ്പെട്ടാണ് കേരള സർവകലാശാല സെനറ്റ് പ്രമേയം പാസാക്കിയത്. സി,​പി,​എം അംഗം ബാബുരാജാണ് പ്രമേയം അവതരിപ്പിച്ചത്.