കൊച്ചി: നടപ്പു സാമ്പത്തിക വർഷത്തെ (2022-23) ആദ്യപാദമായ ഏപ്രിൽ-ജൂണിലെ ജി.ഡി.പി വളർച്ചാക്കണക്ക് കേന്ദ്രസർക്കാർ ഈമാസം 31ന് പുറത്തുവിടാനിരിക്കേ, വളർച്ചയെ സ്വാധീനിക്കുന്ന സുപ്രധാനമേഖലകൾ കാഴ്‌ചവയ്ക്കുന്നത് സമ്മിശ്ര പ്രകടനം. റീട്ടെയിൽ നാണയപ്പെരുപ്പം 6.5 ശതമാനത്തിനുമേൽ തുടരുന്നതാണ് പ്രധാന ആശങ്ക. നാണയപ്പെരുപ്പം 2 - 6 ശതമാനത്തിനുള്ളിൽ നിലനിൽക്കുന്നതാണ് ഇന്ത്യൻ സമ്പദ്‌വ്യവസ്ഥയ്ക്ക് അഭിമ്യം.
നാണയപ്പെരുപ്പം ഉയർന്നതോടെ പർച്ചേസ് ചെലവുകളും വായ്‌പാ ബാദ്ധ്യതകളും കൂടിയത് കമ്പനികളെ തളർത്തുന്നതാണ് തിരിച്ചടി. കഴിഞ്ഞദിവസം ബ്ളൂംബെർഗ് പുറത്തുവിട്ട റിപ്പോർട്ടിൽ ഇന്ത്യയുടെ സാമ്പത്തിക പ്രവർത്തനങ്ങൾക്കുള്ള സ്കോർ 5 ആണ്. സമ്പദ്‌സ്ഥിതി സമ്മിശ്രമെന്ന് ഇതുസൂചിപ്പിക്കുന്നു. സ്കോർ അഞ്ചിനുമുകളിലെങ്കിൽ മികച്ചതും താഴെയെങ്കിൽ മോശവുമാണ്.
കിതച്ചും കുതിച്ചും സമ്പദ്‌മേഖല
വ്യവസായ സ്ഥാപനങ്ങളുടെ സമ്പദ്‌സ്ഥിതിയും ഉപഭോക്താക്കളുടെ വാങ്ങൽശേഷിയും വ്യക്തമാക്കുന്ന പർച്ചേസിംഗ് മാനേജേഴ്‌സ് ഇൻഡക്‌സ് ജൂണിലെ 58.5ൽ നിന്ന് ജൂലായിൽ 56.6 ആയി കുറഞ്ഞു. ആഭ്യന്തര ഉപഭോക്തൃ ഡിമാൻഡ് മെച്ചപ്പെട്ടിട്ടുണ്ട്. വിദേശ ഓർഡറുകളിലെ തളർച്ചയാണ് വലയ്ക്കുന്നത്.
ഇന്ത്യയുടെ കയറ്റുമതി വരുമാനവും ഇറക്കുമതിച്ചെലവും തമ്മിലെ അന്തരമായ വ്യാപാരക്കമ്മി കഴിഞ്ഞമാസം റെക്കാഡ് 3,000 കോടി ഡോളറിലെത്തി. രൂപയുടെ മൂല്യത്തകർച്ച മൂലം ക്രൂഡ് ഇറക്കുമതിച്ചെലവേറിയത് തിരിച്ചടിയായി. ഇന്ത്യയുടെ ഇറക്കുമതിയുടെ മൂന്നിലൊന്നും ക്രൂഡോയിലാണ്.
ജി.ഡി.പിയുടെ നട്ടെല്ലായ ഉപഭോക്തൃവിപണി കരകയറുന്നത് ശുഭസൂചനയാണ്. ഏറെക്കാലത്തെ ഇടവേളയ്ക്കുശേഷം പാസ‍ഞ്ചർ വാഹനവില്പന മികച്ചനിലയിലെത്തി. ടൂവീലർ വില്പനയിൽ വലിയ വളർച്ചയുണ്ട്. ബാങ്ക് വായ്‌പകളിലും വലിയ ഉണർവുണ്ട്; ജൂലായിൽ വളർച്ച മൂന്നുവർഷത്തെ ഉയരമായ 14. ശതമാനം. ബാങ്കുകളിൽ മികച്ച പണലഭ്യതയുണ്ടെന്നതും സ്ഥിതി അനുകൂലമാക്കുന്നു.
വ്യാവസായിക വളർച്ചയെ നിർണയിക്കുന്ന മേയിലെ 19.3 ശതമാനത്തിൽ നിന്ന് ജൂണിൽ 12.8 ശതമാനത്തിലേക്ക് ഇടിഞ്ഞത് നിരാശയാണ്.
ഇന്ത്യ വളരും 13-15.7%
ഒന്നാംപാദത്തിലും ഇന്ത്യ രണ്ടക്ക വളർച്ചാനിരക്ക് ജി.ഡി.പിയിൽ കുറക്കുമെന്നാണ് പ്രമുഖ ധനകാര്യ സ്ഥാപനങ്ങൾ വ്യക്തമാക്കുന്നത്. സമ്പദ്‌രംഗത്ത് മികച്ച തിരിച്ചുകയറ്റം ദൃശ്യമാണെന്ന് എസ്.ബി.ഐ എക്കോറാപ്പ് റിപ്പോർട്ടും റേറ്റിംഗ് ഏജൻസിയായ ഇക്രയുടെ റിപ്പോർട്ടും വ്യക്തമാക്കുന്നു.
ഏപ്രിൽ-ജൂണിൽ 13 ശതമാനമാണ് ഇക്രയുടെ പ്രവചനം. എസ്.ബി.ഐ 15.7 ശതമാനം വളർച്ചയും പ്രതീക്ഷിക്കുന്നു.
ജി.ഡി.പിയുടെ സഞ്ചാരം
(വളർച്ച കഴിഞ്ഞപാദങ്ങളിൽ)
2020-21
ഏപ്രിൽ-ജൂൺ : -23.8%
ജൂലായ്-സെപ്‌തംബർ : -6.6%
ഒക്‌ടോബർ-ഡിസംബർ : 0.7%
ജനുവരി-മാർച്ച് : 2.5%
2021-22
ഏപ്രിൽ-ജൂൺ : 20.1%
ജൂലായ്-സെപ്‌തംബർ : 8.4%
ഒക്‌ടോബർ-ഡിസംബർ : 5.4%
ജനുവരി-മാർച്ച് : 4.1%