കൊച്ചി: ദക്ഷി​ണേന്ത്യൻ കർഷകരുടെ ഇഷ്ടവളമായ ഫാക്ടംഫോസ് ഇനി അറിയപ്പെടുക 'ഭാരത് എൻ.പി.കെ" എന്ന പേരിൽ. കേന്ദ്രസർക്കാരിന്റെ 'വൺ നേഷൻ,​ വൺ ഫെർട്ടിലൈസർ" എന്ന പദ്ധതിയുടെ ഭാഗമായാണ് വളങ്ങൾ 'ഭാരത്" ബ്രാൻഡിൽ വിറ്റഴിക്കുന്നത്.

യൂറിയ, ഡി.എ.പി., എം.ഒ.പി., എൻ.പി.കെ.എസ് എന്നീ രാസവളങ്ങൾ രാജ്യത്തെ ഏത് കമ്പനികൾ നിർമ്മിച്ചാലും ഭാരത് യൂറിയ, ഭാരത് ഡി.എ.പി., ഭാരത് എം.ഒ.പി., ഭാരത് എൻ.പി.കെ എന്ന പേരിലാണ് ഒക്‌ടോബർ രണ്ടുമുതൽ പുറത്തിറക്കേണ്ടത്.

രണ്ട് ആനകൾ പരസ്പരം തുമ്പി​ക്കൈ ഉയർത്തി​ നി​ൽക്കുന്ന ചി​ഹ്നം പതി​പ്പി​ച്ച ചാക്കുകളിൽ ഇനി പുതി​യ പേര് തെളി​യും. പുതി​യ ലോഗോയും. നിർമ്മാണക്കമ്പനിയുടെ പേര് താഴെ എഴുതാം.

പ്രാധാനമന്ത്രി ഭാരതീയ ജനുർവരക് പരിയോജന (പി.എം- ബി.ജെ.പി)​ സബ്സിഡി പദ്ധതിയി​ലാണ് വളങ്ങളെ ഒരു ബ്രാൻഡും ഒരു ലോഗോയുമാക്കി മാറ്രുന്നത്. ഉത്തരവ് കഴി​ഞ്ഞ ബുധനാഴ്ച കേന്ദ്രസർക്കാർ പുറത്തി​റക്കി​. ഇതുപ്രകാരം സെപ്തംബർ 15ന് ശേഷം പുതി​യതരം ചാക്കുകൾക്ക് മാത്രമേ വളം കമ്പനി​കൾക്ക് ഓർഡർ നൽകാനാകൂ.

ഫാക്‌ടിന്റെ ഫാക്ടംഫോസ്

കേന്ദ്ര പൊതുമേഖലാ വളം നിർമ്മാണശാലയായ ഫാക്ടിന്റെ ശ്രദ്ധേയ ഉത്പന്നമാണ് ഫാക്ടംഫോസ്. അമോണിയ രൂപത്തിലുള്ള നൈട്രജനും ഫോസ്ഫറസും (എൻ.പി.കെ) ചേർന്നുള്ള കോംപ്ലക്‌സ് വളം. രാജ്യത്ത് കൃഷി​വി​പ്ളവം നടന്ന കാലത്ത് ഫാക്ട് വളങ്ങൾ നി​ർണായക പങ്കുവഹി​ച്ചി​രുന്നു. ഏത് വി​ളവിനും മണ്ണി​ലും പ്രയോഗി​ക്കാവുന്ന ഫാക്ടംഫോസി​ന്റെ പരസ്യങ്ങൾ റേഡി​യോയി​ലും പത്രങ്ങളി​ലും സി​നി​മാ തീ​യേറ്ററുകളി​ലും നി​റഞ്ഞുനി​ന്ന കാലമുണ്ടായി​രുന്നു.