ന്യൂയോർക്ക് : യു.എസിൽ നിന്ന് ചൈനയിലേക്കുള്ള നാല് ചൈനീസ് കമ്പനികളുടെ 26 വിമാന സർവീസുകൾ റദ്ദാക്കിയെന്ന് യു.എസ്. കൊവിഡ് കേസുകൾ ചൂണ്ടിക്കാട്ടി തങ്ങളുടെ വിമാന സർവീസുകൾ റദ്ദാക്കിയ ചൈനയുടെ നടപടിയ്ക്ക് മറുപടിയായാണ് യു.എസിന്റെ നീക്കം. അമേരിക്കൻ എയർലൈൻസ്, ഡെൽ​റ്റ എയർലൈൻസ്, യുണൈ​റ്റഡ് എയർലൈൻസ് എന്നിവയുടെ 26 സർവീസുകൾ ചൈന റദ്ദാക്കിയിരുന്നു.

ചൈന സതേൺ എയർലൈൻസ്, ചൈന ഈസ്​റ്റേൺ എയർലൈൻസ്, എയർ ചൈന, ഷിയാമെൻ എന്നീ കമ്പനികളുടെ സെപ്തംബർ 5 മുതൽ 28 വരെയുള്ള സർവീസുകൾക്കാണ് വിലക്ക്. ഇതിൽ 19 സർവീസുകൾ ലോസ്‌ആഞ്ചലസിൽ നിന്നാണ്. ന്യൂയോർക്കിൽ നിന്നുള്ള 7 സർവീസുകളും റദ്ദാക്കപ്പെട്ടു.