കേരളത്തിലെ വിവിധ ഭാഗങ്ങളിൽ നിന്നായി ചീഞ്ഞ മത്സ്യം പിടികൂടുന്ന വാർത്തകൾ അടുത്തിടെയായി മാദ്ധ്യമങ്ങളിൽ പതിവാണ്. മീനിൽനിന്ന് ഭക്ഷ്യവിഷബാധയേറ്റുള്ള മരണവാർത്തകളും പുറത്തുവന്നിരുന്നു. മീനിൽ ചേർക്കുന്ന രാവസ്തുക്കളെ എളുപ്പത്തിൽ തിരിച്ചറിയാനാകും. ഇക്കാര്യങ്ങൾ ഒന്നു ശ്രദ്ധിച്ചാൽ മാത്രം മതി.

മീനിൽ ചേ‌ർക്കുന്ന രണ്ട് പ്രധാന രാസവസ്തുക്കളാണ് ഫോർമാലിനും അമോണിയയും. ഇവ ആരോഗ്യത്തിന് ഹാനികരമാണ്. മീനിൽ ചേർക്കുന്ന ഐസ് പെട്ടെന്ന് ഉരുകിപോകാതിരിക്കാനാണ് അമോണിയ ചേർക്കുന്നത്. മോ‌ച്ചറികളിൽ മൃതദേഹങ്ങളിൽ ഉപയോഗിക്കുന്ന ഫോർമാലിനിൽ വലിയ തോതിൽ വിഷാംശം അടങ്ങിയിട്ടുണ്ട്. ഇത് കാൻസറിനും അൾസറിനും കാരണമാവുന്നു. മാത്രമല്ല ദഹനേന്ദ്രിയ വ്യവസ്ഥ, കരൾ, വ‍‍‍‍ൃക്ക, ശ്വാസകോശം, ഹൃദയം, കേന്ദ്രനാഡീവ്യൂഹം എന്നിവയ്ക്കും ഫോർമാലിൻ തകരാറുണ്ടാക്കുന്നു. ആന്തരാവയങ്ങളിൽ നീർവീക്കത്തിനും ഫോർമാലിൻ കാരണമാവുന്നു.

ഫോർമാലിൻ എങ്ങനെ തിരിച്ചറിയാം

മീനിന്റെ കണ്ണിന് നിറവ്യത്യാസം ഉണ്ടാവും

മത്സ്യത്തിന്റെ സ്വാഭാവിക മണം ഉണ്ടാകില്ല

ചെതുമ്പലിന് സ്വാഭാവിക നിറം ഉണ്ടാകില്ല

മത്സ്യം നല്ല കട്ടിയായി കാണപ്പെടും

ഫോർമാലിൻ എങ്ങനെ നീക്കം ചെയ്യാം

ഒരു തവണ ഫോർമാലിൻ ഉപയോഗിച്ചാൽ അത് മീനിൽ നിന്ന് പൂർണമായി നീക്കാൻ സാധിക്കില്ല. എന്നിരുന്നാലും ചെറിയ പൊടിക്കൈകർ ഉപയോഗിക്കാം.

ചെതുമ്പൽ പൂർണമായി നീക്കുക.

മീനുകളുടെ തൊലി നീക്കുക.

കടലമാവ് പുരട്ടി കഴുകുക

മീനിന് സ്വാഭാവിക മണം ഉണ്ടോയെന്ന് ശ്രദ്ധിക്കുക

നല്ല മീൻ എങ്ങനെ നോക്കി വാങ്ങാം

• മീനിന്റെ മാംസത്തിൽ വിരൽകൊണ്ടമർത്തി നോക്കുക. നല്ലതാണെങ്കിൽ ദൃഢമായിരിക്കും. ചീഞ്ഞതാണെങ്കിൽ മാംസം താഴ്‌ന്നുപോകും.
• ഫ്രഷ് മീനിന് വൃത്താകൃതിയുള്ളതും തിളങ്ങുന്നതും തെള‍ിച്ചമുള്ളതുമായ കണ്ണ‍ുകളായിരിക്കും. തിളക്കമില്ലാതെ, കുഴിഞ്ഞിരിക്കുന്നതും ഇളം നീലനിറമുള്ളതുമായ കണ്ണുകൾ ഉള്ളവ ചീഞ്ഞതായിരിക്കും
• മീനിന്റെ ചെകിള ഇളക്കി നോക്കുക. നല്ല ചുവപ്പ് നിറമാണെങ്കിൽ ഫ്രഷ് മീനായിരിക്കും.
• ആന്തരികാവയവങ്ങൾ നീ‍ക്കം ചെയ്യുമ്പോൾ നട്ടെല്ലിന്റെ ഭാഗത്തു നിന്നു വരുന്ന രക്തം നല്ല നിറമുള്ളതാണെങ്കിൽ മീൻ ഫ്രഷായിരിക്കും
• വല്ലാത്ത ദുർഗന്ധമാണ് മീനിൽ നിന്ന് വരുന്നതെങ്കിൽ അത് ചീഞ്ഞ മീനായിരിക്കും