കൊല്ലം: ശക്തികുളങ്ങരയിൽ നിന്ന് തലയോട്ടികൾ കണ്ടെത്തി. ശുചീകരണ തൊഴിലാളികളാണ് പ്രവർത്തനമില്ലാതെ കിടന്ന ആശുപത്രിക്ക് സമീപത്തെ റോഡിൽ നിന്നും രണ്ട് തലയോട്ടികൾ കവറിൽ പൊതിഞ്ഞ നിലയിൽ കണ്ടെത്തിയത്.

ഞായറാഴ്ച രാവിലെ ഒമ്പത് മണിയോടെയാണ് സംഭവം. കവറിൽ തലയോട്ടികളാണെന്ന് കണ്ടതോടെ ശുചീകരണ തൊഴിലാളികൾ ശക്തികുളങ്ങര പൊലീസ് സ്റ്റേഷനിൽ വിളിച്ച് വിവരം അറിയിക്കുകയായിരുന്നു. തുടർന്ന് പൊലീസ് നടത്തിയ പരിശോധനയിൽ തലയോട്ടികൾ ഏറെ പഴക്കം ചെന്നവയാണെന്ന് കണ്ടെത്തി. തലയോട്ടികൾ കൂടാതെ കവറിനുള്ളിൽ നിന്ന് മെഡിക്കൽ വിദ്യാർത്ഥികൾ ഉപയോഗിക്കുന്നതിന് സമാനമായ കുറിപ്പുകളും കണ്ടെത്തി എന്നാണ് പൊലീസ് നൽകിയ വിവരം. രണ്ട് തലയോട്ടികളും പാരിപ്പള്ളി മെഡിക്കൽ കോളേജ് ആശുപത്രിയിൽ സൂക്ഷിച്ച ശേഷം ഫോറൻസിക് പരിശോധനയ്ക്ക് അയച്ചുവെന്നും പൊലീസ് അറിയിച്ചു.