കൊച്ചി: എറണാകുളത്ത് കനത്ത മഴ. കൊച്ചി നഗരത്തിൽ പലയിടത്തും വെള്ളം കയറി. കലൂർ, എം ജി റോഡ്, പനമ്പള്ളി നഗർ, തമ്മനം തുടങ്ങിയ പ്രധാന റോഡുകളിലെ വെള്ളക്കെട്ട് രൂക്ഷമാണ്. എറണാകുളം നോർത്ത് റെയിൽവേ സ്‌റ്റേഷൻ പരിസരത്തും വീടുകളിലും വെള്ളം കയറി.

പാലാരിവട്ടം മുതൽ എംജി റോഡ് വരെ ഗതാഗതം തടസപ്പെട്ടു. കനത്ത മഴയും വെള്ളക്കെട്ടും മൂലം ഹൈക്കോടതി സിറ്റിംഗ് വൈകി. ആലപ്പുഴയിലും അതിശക്തമായ മഴ തുടരുകയാണ്. കുട്ടനാട്ടിലും അപ്പർ കുട്ടനാട്ടിലും ജലനിരപ്പ് ഉയർന്നു. കോട്ടയത്ത് മീനച്ചിലാറിൽ ജലനിരപ്പ് ഉയരുന്നു. പമ്പ ഡാം ഉടൻ തുറക്കും.

അതേസമയം, കേരളത്തിൽ അടുത്ത അഞ്ച് ദിവസം വ്യാപകമായ മഴക്ക് സാദ്ധ്യതയുണ്ട്. ഈ ദിവസങ്ങളിൽ ഒറ്റപ്പെട്ട ശക്തമായ മഴയ്ക്കും ഇടി മിന്നലിനും സാദ്ധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു. ഇന്നും നാളെയും പതിനാല് ജില്ലകളിലും യെല്ലോ അലർട്ട് പ്രഖ്യാപിച്ചു.