തിരുവനന്തപുരം: അഞ്ചുവയസുകാരനെ പ്രകൃതിവിരുദ്ധ ലൈംഗികപീഡനത്തിന് ഇരയാക്കിയ കേസിൽ ചെറിയതുറ ഫിഷർമാൻ കോളനി പുതുവൽപ്പുത്തൻ വീട്ടിൽ മുത്തപ്പന് (35) 25 വർഷം കഠിനതടവും ഒരു ലക്ഷം രൂപ പിഴയും വിധിച്ച് കോടതി.

അസം സ്വദേശിയായ ബാലനെ പീഡിപ്പിച്ച കേസിൽ തിരുവനന്തപുരം പ്രത്യേക അതിവേഗ കോടതിയുടേതാണ് വിധി. പിഴ തുക ഇരയ്ക്ക് നൽകണം. പിഴ അടച്ചില്ലെങ്കിൽ ഒരു വർഷം അധികമായി ശിക്ഷ അനുഭവിക്കേണ്ടി വരുമെന്നും വിധിയിൽ പറയുന്നു.

അസമിൽ നിന്ന് നിർമാണതൊഴിലിനായി എത്തിയ കുടുംബം വലിയതുറയിൽ താമസമാക്കുകയായിരുന്നു. 2017 ഏപ്രിലിലാണ് കേസിനാസ്പദമായ സംഭവം നടന്നത്. വീടിന് സമീപത്തായി കളിക്കുകയായിരുന്ന കുട്ടിയെ പ്രതി പീഡനത്തിനിരയാക്കുകയായിരുന്നു. തുടർന്ന് കുട്ടി വീട്ടിൽ വിവരമറിയിക്കുകയും അന്നുതന്നെ പൊലീസിൽ പരാതി നൽകുകയും ചെയ്തു. പ്രതി റിമാൻഡിൽ കഴിഞ്ഞ കാലയളവ് ശിക്ഷയിൽ നിന്ന് കുറച്ചിട്ടുണ്ട്.