വടക്കഞ്ചേരി: എസ്.എൻ.ഡി.പി യോഗം വടക്കഞ്ചേരി യൂണിയന്റെ പരിധിയിലെ നാല് പഞ്ചായത്തുകളിലുള്ള ശാഖാ യോഗങ്ങളിൽ നടപ്പാക്കുന്ന ആരോഗ്യ പരിരക്ഷ പദ്ധതിയുടെ യൂണിയൻ തല ഉദ്ഘാടനം യൂണിയൻ സെക്രട്ടറി കെ.എസ്. ശ്രീജേഷ് നിർവഹിച്ചു.
കല്ലിങ്കൽ പാടം ശാഖാ യോഗത്തിൽ നടന്ന പരിപാടിയിൽ ശാഖാ പ്രസിഡന്റ് കെ.ജി. ശ്രീകുമാരൻ അദ്ധ്യക്ഷനായി. യൂണിയൻ വൈസ് പ്രസിഡന്റ് എം.ആർ. കൃഷ്ണൻകുട്ടി പദ്ധതിയുടെ സന്ദേശം നൽകി. ശാഖാ സെക്രട്ടറി കെ.ആർ. രാജൻ സ്വാഗതം പറഞ്ഞു. യൂണിയൻ വനിതാ സംഘം വൈസ് പ്രസിഡന്റ് സ്മിത നാരായണൻ, പി.എസ്. സുമിത്ത്, യു. സുഭാഷ് എന്നിവർ സംസാരിച്ചു. ശാഖാ വൈസ് പ്രസിഡന്റ് എം.കൃഷ്ണൻ നന്ദി അറിയിച്ചു.
വടക്കഞ്ചേരി മെഡികെയർ ഹോസ്പിറ്റലുമായി ചേർന്നാണ് പദ്ധതി നടപ്പിലാക്കുന്നത്. വഴുക്കുംപാറ ബൈക്ക് അപകടത്തിൽ മരണപ്പെട്ട സി.വി. രാജന്റെ മകൻ മനുരാജന് യൂണിയന്റെ പഠന സ്‌കോളർഷിപ്പ് ചടങ്ങിൽ വിതരണം ചെയ്തു.