മല്ലപ്പള്ളി : ആനിക്കാട് പഞ്ചായത്തിലെ പ്രധാന പാതയിൽ ഒന്നായ ആനിക്കാട് - കവനാൽക്കടവ് - നെടുംകുന്നും റോഡിന് 49.5 ലക്ഷം രൂപയുടെ ഭരണാനുമതിയായി. റോഡ് ബി.എം ബിസി നിലവാരത്തിലാക്കുന്നതിനുള്ള ടെൻഡർ നടപടി പൂർത്തിയാക്കി നിർമ്മാണ പ്രവർത്തികൾ ആരംഭിക്കാൻ തുടങ്ങിയ അവസരത്തിലായിരുന്നു വാട്ടർ അതോറിട്ടി മല്ലപ്പള്ളി - ആനിക്കാട്, കോട്ടാങ്ങൽ പഞ്ചായത്തുകളിൽ കുടിവെള്ളപൈപ്പ് സ്ഥാപിക്കുന്നതിന് അനുമതിതേടിയത്. പൈപ്പ് ലൈൻ നിർമ്മാണം ഈ മാസം പൂർത്തിയാകുന്നതോടെ റോഡിന്റെ ശോചനീയാവസ്ഥയ്ക്കും മാറ്റമാകും. പൈപ്പ് ലൈൻ സ്ഥാപിക്കുന്നതിന് എടുത്ത കുഴികളാണ് മഴ ശക്തിപ്രാപിച്ചതോടെ തകർച്ചയിലേക്ക് നയിച്ചത്. കുഴികളുടെ ആഴവും വിസ്തൃതിയും മനസിലാക്കാൻ കഴിയാത്ത സ്ഥിതിയിലായിരുന്നു യാത്രക്കാർക്ക്.എതിർ ദിശയിൽ നിന്നും വാഹനങ്ങൾ വരുമ്പോൾ വശത്തേക്ക് ഇറങ്ങി നിൽക്കുവാൻ കഴിയാത്തതിനാൽ ഇതുവഴിയുള്ള കാൽനട യാത്രയും അപകടഭീതിയിലായിരുന്നു. ഇരുചക്ര വാഹന യാത്രികരാണ് ഏറെയും അപകടത്തിൽപ്പെടുന്നത്. ബി.എം.ബി.സി നിലവാരത്തിൽ റോഡ് നിർമ്മാണം പൂർത്തിയായാൽ ദുരിതയാത്രയിൽ നിന്നും യാത്രക്കാർക്ക് മോചനമാകും.