പത്തനംതിട്ട: കൊടുമൺ പൊലീസ് സ്റ്റേഷനിൽ റൗഡി ലിസ്റ്റിൽ ഉൾപ്പെട്ട യുവാവിനെ ജാമ്യവ്യവസ്ഥ ലംഘിച്ചതിന് അറസ്റ്റ് ചെയ്തു. കൊടുമൺ ഇടത്തിട്ട വിഷ്ണുഭവനം വീട്ടിൽ തമ്പിയുടെ മകൻ വിഷ്ണു (26)വിനെയാണ് ഇന്നലെ പിടികൂടി റിമാൻഡ് ചെയ്തത്. മോഷണം, കഠിന ദേഹോപദ്രവം ഉൾപ്പെടെ കൊടുമൺ പൊലീസ് സ്റ്റേഷനിൽ 10 ക്രിമിനൽ കേസുകളിൽ പ്രതിയാണ് ഇയാൾ. ജൂൺ 13 ന് രാത്രി കൊടുമൺ ബിവറേജസിന് സമീപം ഇയാളും രണ്ടുപേരും കൂടി സ്‌ക്വയർ പൈപ്പ് കൊണ്ട് ഒരാളുടെ തല അടിച്ചുപൊട്ടിച്ചതിന് രജിസ്റ്റർ ചെയ്ത കേസാണ് ഒടുവിലത്തേത്. പൊലീസ് ഇൻസ്‌പെക്ടർ പ്രവീണിന്റെ നേതൃത്വത്തിലുള്ള അന്വേഷണസംഘത്തിൽ എസ് ഐ മനീഷ്, എസ് സി പി ഓ ശിവപ്രസാദ്, സി പി ഓ മാരായ പ്രദീപ്, ജിതിൻ, ശരത് എന്നിവരാണ് ഉണ്ടായിരുന്നത്.