തിരുവല്ല: സംസ്ഥാന ജീവനക്കാർക്കും അദ്ധ്യാപകർക്കും 2021 ജനുവരി ഒന്നുമുതൽ നൽകാനുള്ള ക്ഷാമബത്ത കുടിശിക ഓണത്തിന് മുമ്പായി നൽകണമെന്ന് കേരള സ്റ്റേറ്റ് ടീച്ചേഴ്സ് സെന്റർ ജില്ലാ കൗൺസിൽ ആവശ്യപ്പെട്ടു. 2021 ജനുവരി ഒന്നുമുതൽ രണ്ടു ശതമാനവും 2021 ജൂലൈ ഒന്നുമുതലുള്ള മൂന്ന് ശതമാനവും 2022 ജനുവരി 1 മുതലുള്ള മൂന്ന് ശതമാനവും 2022 ജൂലൈ ഒന്നുമുതലുള്ള മൂന്ന് ശതമാനവുമാണ് നൽകാനുള്ളത്. ആഗസ്റ്റിലെ ശമ്പളത്തോടൊപ്പം ക്ഷാമബത്ത കുടിശിക 11% നൽകാൻ സർക്കാർ തയാറാകണം. കൂടാതെ ഓണക്കാല ബോണസും ഫെസ്റ്റിവൽ അലവൻസും കാലാനുസൃതമായി വർദ്ധിപ്പിക്കണമെന്നും കേരള സ്റ്റേറ്റ് സെന്റർ ആവശ്യപ്പെട്ടു. പ്രസിഡന്റ് കെ.ബിനു അദ്ധ്യക്ഷത വഹിച്ചു. സംസ്ഥാന സെക്രട്ടറി റോയി വർഗീസ് ഇലവുങ്കൽ ഉദ്ഘാടനം ചെയ്തു. റെനി ആനി, ജോൺ മാത്യു, ബൈജു തോമസ് തുടങ്ങിയവർ പ്രസംഗിച്ചു.