കൊല്ലം: അനുകമ്പയോടെയുള്ള പ്രവർത്തനമാണ് എസ്.എൻ.ഡി.പി യോഗം നടത്തുന്നതെന്ന് എസ്.എൻ ട്രസ്റ്റ് ബോർഡ് അംഗം പ്രീതി നടേശൻ പറഞ്ഞു. യോഗത്തിന്റെയും എസ്.എൻ ട്രസ്റ്റിന്റെയും അമരത്ത് വെള്ളാപ്പള്ളി നടേശൻ 25 വർഷം പൂർത്തിയാക്കിയതിന്റെ ഭാഗമായി ശ്രീനാരായാണ എംപ്ലോയീസ് ഫോറവും ശ്രീനാരായണ പെൻഷണേഴ്‌സ് കൗൺസിലും സംയുക്തമായി കൊല്ലം എസ്.എൻ വനിതാ കോളേജിൽ സംഘടിപ്പിച്ച സൗജന്യ നേത്ര പരിശോധനയും തിമിര ശസ്ത്രക്രിയ ക്യാമ്പും ഉദ്ഘാടനം ചെയ്യുകയായിരുന്നു പ്രീതി നടേശൻ.

സൗജന്യ നേത്രചികിത്സാ ക്യാമ്പിലൂടെ യോഗം ആയിരങ്ങൾക്ക് ഇരുട്ടിൽ നിന്ന് വെളിച്ചത്തിലേക്കുള്ള വാതിൽ തുറന്നുകൊടുക്കുകയാണ്. ഇതിന് നിരവധി സന്മനസുകളുടെ പിന്തുണയുണ്ട്. ഗുരുദർശനം പ്രാവർത്തികമാക്കാൻ ഊർജിത ശ്രമം ഉണ്ടാകണം. ഓരോ യൂണിയനെയും വിവിധ മേഖലകളായി തിരിച്ച് എല്ലാ ജാതിമതസ്ഥരെയും പങ്കെടുപ്പിച്ച് കൂടുതൽ സൗജന്യ ചികിത്സാ ക്യാമ്പുകൾ സംഘടിപ്പിക്കണമെന്നും പ്രീതി നടേശൻ പറഞ്ഞു.

എംപ്ലോയീസ് ഫോറം കേന്ദ്രസമിതി പ്രസിഡന്റ് എസ്. അജുലാൽ അദ്ധ്യക്ഷനായി. എസ്.എൻ ട്രസ്റ്റ് ട്രഷറർ ഡോ. ജി. ജയദേവൻ, യോഗം കൗൺസിലർമാരായ പി. സുന്ദരൻ, പച്ചയിൽ സന്ദീപ്, യോഗം കൊല്ലം യൂണിയൻ പ്രസിഡന്റ് മോഹൻ ശങ്കർ, സെക്രട്ടറി എൻ. രാജേന്ദ്രൻ, കുണ്ടറ യൂണിയൻ സെക്രട്ടറി അഡ്വ. അനിൽകുമാർ, കൊല്ലം യൂണിയൻ പഞ്ചായത്ത് അംഗം സജീവൻ, എംപ്ലോയീസ് ഫോറം ട്രഷറർ ഡോ. എസ്. വിഷ്ണു, പെൻഷണേഴ്‌സ് കൗൺസിൽ പ്രസിഡന്റ് പി.ആർ. ജയചന്ദ്രൻ, ജി. ചന്തു, ഫോറം ഭാരവാഹികളായ ചേപ്പാട് ബിജു, എസ്. ഗിരീഷ് കുമാർ, ടി.എസ്. മായ, എസ്. സുരേഷ്, ഡോ. ശില്പ ശശാങ്കൻ, പി.ജെ. അർച്ചന, അഭിലാഷ് റാന്നി എന്നിവർ സംസാരിച്ചു.
ശ്രീനാരായണ സേവക് പുരസ്‌കാരം നേടിയ എസ്. അജുലാലിനെയും നാഷണൽ സർവീസ് സ്‌കീം സംസ്ഥാന അവാർഡ് നേടിയ ഡോ. എസ്. വിഷ്ണുവിനെയും ഉന്നത വിജയം നേടിയ കുട്ടികളെയും യോഗത്തിൽ ആദരിച്ചു. എംപ്ലോയീസ് ഫോറം കോ- ഓർഡിനേറ്റർ പി.വി. രജിമോൻ സ്വാഗതവും ഡോ. കെ. സാബുക്കുട്ടൻ നന്ദിയും പറഞ്ഞു. ക്യാമ്പിൽ ഇരുനൂറോളം പേർ പങ്കെടുത്തു. 25 പേർക്ക് സൗജന്യ ശസ്ത്രക്രിയയ്ക്ക് നടപടികളായി.