കൊല്ലം: സുഹൃത്തിന്റെ വീട്ടിലേക്ക് പോയ 19 കാരനെ ക്രൂരമായി മർദ്ദിച്ച നാലംഗ മദ്യപസംഘത്തിലെ ഒരാൾ അറസ്റ്റിൽ. ഇരവിപുരം പവിത്രം നഗർ വയലിൽ വീട്ടിൽ മണികണ്ഠനാണ് (41) ഇരവിപുരം പൊലീസിന്റെ പിടിയിലായത്. മൂന്നുപേർ ഒളിവിലാണ്. എന്നാൽ കോഴിയെ മോഷ്ടിച്ചുവെന്ന് ആരോപിച്ചാണ് മർദ്ദിച്ചതെന്നാണ് മണികണ്ഠൻ നൽകിയ മൊഴി.

കഴിഞ്ഞ ദിവസം വൈകിട്ട് 6 ഓടെ ഇരവിപുരം ഫിലിപ്പ് മുക്കിലായിരുന്നു സംഭവം. ഇരവിപുരം വാളത്തുംഗൽ സ്വദേശി നീലകണ്ഠനാണ് (19) മർദ്ദനമേ​റ്റത്. സുഹൃത്തായ അനന്തുവിന്റെ വീട്ടിലേക്ക് പോകുമ്പോൾ റോഡരികിൽ നിന്ന എട്ടോളം വരുന്ന മദ്യപസംഘം ലേയ്‌സ് ആവശ്യപ്പെട്ടു. ഒരെണ്ണമേയുള്ളൂവെന്ന് പറഞ്ഞതിനെ തുടർന്നായിരുന്നു മർദ്ദനം. സംഭവം ഫോണിൽ ചിത്രീകരിച്ച അനന്തുവിന് നേരെയും ആക്രമണമുണ്ടായി. സംഭവത്തിന്റെ ദൃശ്യങ്ങൾ നവമാദ്ധ്യമങ്ങളിൽ വൈറലായിരുന്നു. തുടർന്ന് നീലകണ്ഠൻ നൽകിയ പരാതിയിൽ ഇരവിപുരം പൊലീസ് കേസെടുക്കുകയായിരുന്നു.