
 രജിസ്ട്രേഷൻ രാവിലെ 9ന്
കൊല്ലം: ഇത്തവണത്തെ പ്ലസ് ടു പരീക്ഷയിൽ ജില്ലയിൽ എല്ലാ വിഷയങ്ങൾക്കും എ പ്ലസ് നേടിയ വിദ്യാർത്ഥികൾക്കും സി.ബി.എസ്.ഇ പന്ത്രണ്ടാം ക്ലാസ് പരീക്ഷയിലെ സ്കൂൾ ടോപ്പർമാർക്കും കേരളകൗമുദിയും എൻജിനിയറിംഗ് മെഡിക്കൽ എൻട്രൻസ് കോച്ചിംഗ് രംഗത്ത് സ്വപ്നവിജയം സമ്മാനിക്കുന്ന സഫയർ ഗ്രൂപ്പും പ്രമുഖ ധനകാര്യ സ്ഥാപനമായ ആർ.പി ബാങ്കേഴ്സും ചേർന്ന് നൽകുന്ന ആദരവ് ഇന്ന് നടക്കും.
കൊല്ലം കർബല ജംഗ്ഷനിലെ എസ്.എൻ ട്രസ്റ്റ് സെൻട്രൽ സ്കൂളിൽ രാവിലെ 11ന് നടക്കുന്ന ആദരവ് സമ്മേളനം എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശൻ ഉദ്ഘാടനം ചെയ്യും.
കേരളകൗമുദി റസിഡന്റ് എഡിറ്ററും കൊല്ലം യൂണിറ്റ് ചീഫുമായ എസ്. രാധാകൃഷ്ണൻ അദ്ധ്യക്ഷനാകും. കൃഷി വകുപ്പ് സെക്രട്ടറി ഡോ. ബി. അശോക്, കൊല്ലം റൂറൽ എസ്.പി കെ.ബി. രവി എന്നിവർ മുഖ്യാതിഥികളായെത്തും. സഫയർ എൻട്രൻസ് കോച്ചിംഗ് സെന്റർ മാനേജിംഗ് ഡയറക്ടർ ഡോ. വി. സുനിൽകുമാർ, ആർ.പി. ബാങ്കേഴ്സ് മാനേജിംഗ് ഡയറക്ടർ ആർ. പ്രകാശൻപിള്ള എന്നിവർ ചടങ്ങിലെ മുഖ്യസാന്നിദ്ധ്യമായിരിക്കും. എസ്.എൻ ട്രസ്റ്റ് സെൻട്രൽ സ്കൂൾ സ്പെഷ്യൽ ഓഫീസർ പ്രൊഫ. കെ. സാംബശിവൻ, ഓൾ കേരള പ്രൈവറ്റ് ബാങ്കേഴ്സ് അസോസിയേഷൻ ജില്ലാ പ്രസിഡന്റ് ജി. ശുഭവർമ്മ രാജ എന്നിവർ ആശംസ നേരും. എസ്.എൻ ട്രസ്റ്റ് സെൻട്രൽ സ്കൂൾ വിദ്യാർത്ഥികളുടെ ഈശ്വര പ്രാർത്ഥനയോടെയാകും ചടങ്ങിന് തിരിതെളിയുക. കേരളകൗമുദി കൊല്ലം ബ്യൂറോ ചീഫ് ബി. ഉണ്ണിക്കണ്ണൻ സ്വാഗതവും പ്രത്യേക ലേഖകൻ സാം ചെമ്പകത്തിൽ നന്ദിയും പറയും
10ന് കരിയർ ഗൈഡൻസ്  ക്ളാസ്
ആദരവ് സമ്മേളനത്തിന് മുന്നോടിയായി കൃത്യം പത്തുമണിക്ക് സഫയർ ഫ്യൂച്ചർ അക്കാഡമി സി.ഇ.ഒ ടി. സുരേഷ് കുമാർ (പി.എസ്.കെ), ചീഫ് മെന്റർ യഹിയ.പി.അമയം, അക്കാഡമിക് ഡയറക്ടർ ഡോ. ജോൺ.ജെ.ലാൽ എന്നിവരുടെ നേതൃത്വത്തിലുള്ള കരിയർ ഗൈഡൻസ് ക്ളാസ് നടക്കും. 
ആദരവ് ചടങ്ങിലേക്ക് ഇ- മെയിൽ മുഖാന്തിരം അപേക്ഷ സമർപ്പിച്ചിട്ടുള്ള വിദ്യാർത്ഥികൾ 9 മണിക്കെത്തി പേര് രജിസ്റ്റർ ചെയ്യണം. പങ്കെടുക്കുന്ന മുഴുവൻ വിദ്യാർത്ഥികൾക്കും മൊമന്റോയും മെഡലും സർട്ടിഫിക്കറ്റുകളും നൽകും.