കുന്നത്തൂർ: നാടൻ പാട്ടുകാരനും ചിത്രകാരനുമായിരുന്ന പി.എസ്. ബാനർജിയുടെ ഒന്നാം ഓർമ്മദിനത്തിൽ നാട്ടുകലാകാരക്കൂട്ടം ജില്ലാ കമ്മിറ്റിയും ബാനർജി അനുസ്മരണ സമിതിയും സംയുക്തമായി സംഘടിപ്പിച്ച 'ഓർമ്മയിൽ ബാനർജി' ഹൃദയസ്പർശിയായി. ഭരണിക്കാവ് തറവാട് ഓഡിറ്റോറിയത്തിൽ നടന്ന പരിപാടിയിൽ രാഷ്ട്രീയ-സാമൂഹിക-സംസ്കാരിക മേഖലകളിലെ നിരവധി പ്രമുഖർ പങ്കെടുത്തു. രാവിലെ 9 ന് ബാനർജിയുടെ സ്മൃതി കുടീരത്തിൽ പുഷ്പാർച്ചനയോടെയാണ് പരിപാടികൾക്ക് തുടക്കമിട്ടത്.തുടർന്ന് ഇരുപതോളം ചിത്രകാരൻമാർ ചേർന്ന് വരയോളം എന്ന പേരിൽ തത്സമയം ബാനർജിയുടെ ജീവിതത്തെ കാൻവാസിൽ പകർത്തി. ചിത്രകാരൻ കെ.പി. മുരളീധരൻ ഉദ്ഘാടനം നിർവഹിച്ചു. പാട്ടോളം എന്ന പേരിൽ ബാനർജിയുടെ പാട്ടുകളുടെ അവതരണവും നടന്നു. അനുസ്മരണ സമ്മേളനം ഡെപ്യൂട്ടി സ്പീക്കർ ചിറ്റയം ഗോപകുമാർ ഉദ്ഘാടനം ചെയ്തു. സഞ്ജയ് പണിക്കർ അദ്ധ്യക്ഷനായി. ചടങ്ങിൽ കലാരംഗത്ത് മികവ് തെളിയിച്ചവർക്കായി ബാനർജി അനുസ്മരണ സമിതി ഏർപ്പെടുത്തിയ പ്രഥമ പുരസ്കാരം ഗാനരചയിതാവും പിന്നണി ഗായകനുമായ മണികണ്ഠൻ പെരുമ്പടപ്പ് ചലച്ചിത്ര അക്കാഡമി വൈസ് ചെയർമാനും ചലച്ചിത്ര താരവുമായ പ്രേംകുമാറിൽ നിന്ന് ഏറ്റുവാങ്ങി. എം.എൽ.എ മാരായ കോവൂർ കുഞ്ഞുമോൻ,പി.സി. വിഷ്ണുനാഥ്,സി.ആർ. മഹേഷ്,ഫോക്ർലോർ അക്കാഡമി ചെയർമാൻ ഒ.എസ്.ഉണ്ണികൃഷ്ണൻ,നാട്ടു കലാകാരക്കൂട്ടം സംസ്ഥാന ജനറൽ സെക്രട്ടറി ബൈജു തൈവമക്കൾ, സി.ജെ. കുട്ടപ്പൻ,അഡ്വ.അൻസർ ഷാഫി,ജില്ലാ പഞ്ചായത്തംഗം പി.കെ. ഗോപൻ,ബ്ലോക്ക് പഞ്ചായത്തംഗങ്ങളായ സനൽകുമാർ, തുണ്ടിൽ നൗഷാദ്,പഞ്ചായത്ത് പ്രസിഡന്റുമാരായ ഡോ.സി.ഉണ്ണികൃഷ്ണൻ,ഗീത തുടങ്ങിയവർ പങ്കെടുത്തു.