കുന്നിക്കോട് : മൈലം-കുരാ റോഡിൽ വായനശാല അങ്കണവാടിക്ക് സമീപത്തുള്ള വീടിന്റെ മുകളിലേക്ക് കോൺക്രീറ്റുമായി വന്ന റെഡിമിക്സ് വാഹനം മറിഞ്ഞു. അഖിൽ ഭവനിൽ രാമചന്ദ്രന്റെ വീടിന് മുകളിലേക്കാണ് വാഹനം മറിഞ്ഞ് കേടുപാടുകൾ സംഭവിച്ചത്. ഇന്നലെ രാവിലെ 9.30 നാണ് സംഭവം. കയറ്റം കയറുന്നതിനിടെ വാഹനത്തിന്റെ ടയർ പൊട്ടുകയായിരുന്ന. പിന്നിലോട്ട് ഉരുണ്ട് നീങ്ങിയ വാഹനം നിയന്ത്രണം വിട്ട് വീടിന്റെ മുകളിലേക്ക് മറിയുകയായിരുന്നു. വീടിന്റെ ഹാൾ പൂർണമായും തകർന്നു. ബാക്കി ഭാഗങ്ങൾക്ക് ഭാഗീകമായ കേടുപാടുകൾ സംഭവിച്ചിട്ടുണ്ട്. സംഭവം നടക്കുമ്പോൾ രാമചന്ദ്രന്റെ ഭാര്യ ഗിരിജ വീട്ടിലുണ്ടായിരുന്നു. അതി ഭയങ്കരമായ ശബ്ദം കേട്ട് ഗിരിജ ഓടി മാറിയതിനാൽ അപകടത്തിൽ നിന്ന് രക്ഷപ്പെട്ടു. അടൂരിൽ നിന്ന് കുന്നിക്കോട് ഭാഗത്തേക്ക് കോൺക്രീറ്റുമായി വന്ന അടൂർ സ്വദേശിയുടെ ഉടമസ്ഥതയിലുള്ള വാഹനമാണ് അപകടത്തിൽപ്പെട്ടത്. വാഹനത്തിന്റെ ഡ്രൈവർക്ക് നിസാര പരിക്കേറ്റു. വിവരം അറിയിച്ചതിനെ തുടർന്ന് പത്തനാപുരം അഗ്നിരക്ഷാ സേനയും കുന്നിക്കോട് പൊലീസും സംഭവ സ്ഥലത്തെത്തി തുടർ നടപടികൾ സ്വീകരിച്ചു.