പത്തനാപുരം: എസ്.എൻ.ഡി.പി യോഗം പത്തനാപുരം യൂണിയൻ പ്രവർത്തക സമ്മേളനത്തിനായി പത്തനാപുരം ഒരുങ്ങി. യോഗം ജനറൽ സെക്രട്ടറി വെള്ളാപ്പള്ളി നടേശനെയും മറ്റ് വിശിഷ്ടാതിഥികളെയും വരവേൽക്കാൻ നാട് പീതപതാകയിൽ അലങ്കരിച്ച് കഴിഞ്ഞു. നാളെ നടക്കുന്ന യൂണിയൻ പ്രവർത്തക സമ്മേളനം കല്ലുംകടവ് മംഗല്യ ഓഡിറ്റോറിയത്തിൽ വൈകിട്ട് 3 മണിക്ക് യോഗം ജനറൽ സെക്രട്ടറി വെള്ളാപ്പള്ളി നടേശൻ ഉദ്ഘാടനം ചെയ്യും. സമ്മേളനത്തിന്റെ ഭദ്രദീപ പ്രകാശനം ട്രസ്റ്റ് ബോർഡ് മെമ്പർ പ്രീതി നടേശൻ നിർവഹിക്കും.വനിതാസംഘം കലോത്സവ വിജയികൾക്കുള്ള അവാർഡ് വിതരണം യോഗം അസി.സെക്രട്ടറി വനജ വിദ്യാധരൻ നിർവഹിക്കും. യൂണിയൻ പ്രസിഡന്റ് ആദം കോട് കെ.ഷാജി അദ്ധ്യക്ഷനാകും. യോഗം ഡയറക്ടർ ബോർഡ് അംഗങ്ങളായ പിറവന്തൂർ ഗോപാലകൃഷ്ണൻ, എം.എം.രാജേന്ദ്രൻ, യൂണിയൻ കൗൺസിലർമാരായ വി.ജെ.ഹരിലാൽ, പി.ലെജു, ജി.ആനന്ദൻ , ബി.കരുണാകരൻ, യൂണിയൻ കൗൺസിലറും യൂത്ത്മൂവ്മെന്റ് യൂണിയൻ പ്രസിഡന്റുമായ റിജു വി.ആമ്പാടി, യൂണിയൻ കൗൺസിലറും വനിതാ സംഘം യൂണിയൻ സെക്രട്ടറിയുമായ എസ്.ശശി പ്രഭ, യൂണിയൻ പഞ്ചായത്ത് കമ്മിറ്റി അംഗങ്ങളായ എൻ.പി.ഗണേഷ് കുമാർ , എൻ.ഡി.മധു , എസ്.ചിത്രാംഗദൻ , യൂണിയൻ വനിതാ സംഘം പ്രസിഡന്റ് സുലതാ പ്രകാശ്, സൈബർ സേന കേന്ദ്ര സമിതി ജോ. കൺവീനർ ബിനു സുരേന്ദ്രൻ എന്നിവർ സംസാരിക്കും. യൂണിയൻ സെക്രട്ടറി ബി.ബിജു സ്വാഗതവുംവൈസ് പ്രസിഡന്റ് കെ. കെ. ശശീന്ദ്രൻ നന്ദിയും പറയും.
പീത പതാകകളും തോരണങ്ങളും
കല്ലും കടവ് ,നെടുംപറമ്പ്, ടൗൺ, പഞ്ചായത്ത് പടി എന്നിവിടങ്ങളിൽ റോഡ് വശത്ത് പീത പതാകകളും തോരണങ്ങളും ബാനറുകളും ഫ്ലക്സ് ബോർഡുകളും നിറഞ്ഞു. എല്ലാവിധ ഒരുക്കങ്ങളും പൂർത്തിയായതായി യൂണിയൻ ഭാരവാഹികൾ അറിയിച്ചു.
ധനസഹായ, മെരിറ്റ് അവാർഡ് വിതരണം
ചടങ്ങിൽ ചികിത്സാ ധനസഹായം, ഓണക്കിറ്റ് , എസ്.എസ് .എൽ. സി , പ്ളസ് ടു ക്ലാസുകളിൽ മുഴുവൻ എ പ്ലസ് നേടിയവർക്കും ഡിഗ്രി തലത്തിൽ റാങ്ക് നേടിയവർക്കും മെരിറ്റ് അവാർഡ്, വനിതാ സംഘം കലോത്സവ വിജയികൾക്കുള്ള അവാർഡ്, ഏകാത്മകം ഗിന്നസ് വേൾഡ് റെക്കാഡ് ജേതാക്കൾക്കുള്ള ഗിന്നസ് സർട്ടിഫിക്കറ്റ് , യൂണിയൻ പരിധിയിൽ നിന്ന് കൊവിഡ് ബാധിച്ച് മരിച്ചവരുടെ ആശ്രിതർക്കുള്ള ധനസഹായം എന്നിവ വിതരണം ചെയ്യും.