കുന്നത്തൂർ: വാഹനാപകടത്തിൽ പരിക്കേറ്റ് കൊല്ലത്തെ സ്വകാര്യ മെഡിക്കൽ കോളേജ് ആശുപത്രിയിൽ ചികിത്സയിലായിരുന്ന റിട്ട. അദ്ധ്യാപകൻ മരിച്ചു. മൈനാഗപ്പള്ളി ഇടവനശേരി സരയൂവിൽ (പ്രസാദ് ഭവനം) കെ.ജെ.പ്രസാദ് കുമാറാണ് (62) മരിച്ചത്.

മുഖത്തല ഹയർ സെക്കൻഡറി സ്കൂളിലെ മുൻ അദ്ധ്യാപകനായിരുന്നു. കഴിഞ്ഞ ശനിയാഴ്ച ഇടവനശേരി ലക്കി ജംഗ്ഷനിലായിരുന്നു അപകടം. റോഡ് മുറിച്ചുകടക്കുന്നതിനിടെ അമിത വേഗതയിലെത്തിയ സ്കൂട്ടർ ഇടിച്ച് തെറിപ്പിക്കുകയായിരുന്നു.

തലയ്ക്ക് ഗുരുതരമായി പരിക്കേറ്റതിനെ തുടർന്ന് തീവ്രപരിചരണ വിഭാഗത്തിൽ ചികിത്സയിലായിരുന്നു. കടപ്പ കിഴക്ക് ക്ഷേമോദയം എൻ.എസ്.എസ് കരയോഗം പ്രസിഡന്റ്, ഇടവനശേരി കിഴക്കേ പുതുവീട്ടിൽ ക്ഷേത്രം കമ്മിറ്റി പ്രസിഡന്റ്, മൈനാഗപ്പള്ളി കാർഷിക വിപണി ട്രഷറർ തുടങ്ങിയ നിലകളിൽ പ്രവർത്തിച്ചുവരികയായിരുന്നു.സംസ്കാരം പിന്നീട്. ഭാര്യ: ഗിരിജ (റിട്ട. അദ്ധ്യാപിക). മക്കൾ: സ്വാതി, അശ്വതി. മരുമകൻ: അർജുൻ.