കൊടകര: ഇരിങ്ങാലക്കുട രൂപത എഡ്യുക്കേഷണൽ ട്രസ്റ്റിന്റെ കീഴിലുള്ള കൊടകര സഹൃദയ എൻജിനിയറിംഗ് കോളേജിലെ ബി.ടെക് ബ്രാഞ്ചുകൾക്ക് എൻ.ബി.എ അംഗീകാരം. കോളേജിലെ ബയോടെക്‌നോളജി, ബയോമെഡിക്കൽ, കമ്പ്യൂട്ടർ സയൻസ്, സിവിൽ ബ്രാഞ്ചുകൾക്കാണ് നാഷണൽ ബോർഡ് ഒഫ് അക്രഡിറ്റേഷന്റെ അംഗീകാരം ലഭിച്ചത്.
കോളേജിലെ വിജയശതമാനം,പ്ലെയ്‌സ്‌മെന്റ്, ടെക്‌നോളജിക്കൽ ഇൻകുബേഷൻ സെന്റർ, ലാബുകൾ, ക്ലാസ് റൂമുകൾ, ലൈബ്രറി തുടങ്ങി നിരവധി നേട്ടങ്ങളും സൗകര്യങ്ങളും വിലയിരുത്തിയാണ് എൻ.ബി.എ അംഗീകാരം ലഭിച്ചത്. ഇതുസംബന്ധിച്ച് ഡൽഹിയിൽ നിന്നുള്ള വിദഗ്ദ്ധ സംഘം കോളേജിൽ സന്ദർശനം നടത്തിയിരുന്നു. ഇവരുടെ റിപ്പോർട്ട് പ്രകാരമാണ് സഹൃദയയ്ക്ക് എൻ.ബി.എ നൽകിയത്.
എൻ.ബി.എ അംഗീകാരം നേടിയ സഹൃദയ എൻജിനിയറിംഗ് കോളേജിനെ മാനേജ്‌മെന്റ് അനുമോദിച്ചു. ചെയർമാൻ ബിഷപ്പ് മാർ പോളി കണ്ണൂക്കാടൻ, ട്രസ്റ്റ് പ്രസിഡന്റ് മോൺ. ജോയ് പാലിയേക്കര, എക്‌സിക്യൂട്ടിവ് ഡയറക്ടർ ഫാ. ജോർജ് പാറേമാൻ, ജോയിന്റ് ഡയറക്ടർ, ഡോ. സുധ ജോർജ് വളവി, പ്രിൻസിപ്പൽ ഡോ. നിക്‌സൺ കുരുവിള തുടങ്ങിയവർ പ്രസംഗിച്ചു.