ഗുരുവായൂർ: ഗുരുവായൂരിൽ നിന്നും തിരുനാവായയ്ക്കുള്ള റെയിൽ പാത നിർമ്മാണം അട്ടിമറിക്കപ്പെട്ടത് ഇടുങ്ങിയ രാഷ്ട്രീയ താത്പര്യങ്ങൾ മൂലമാണെന്ന് എൻ.കെ. അക്ബർ എം.എൽ.എ. ദൃശ്യ ഗുരുവായൂരിന്റെ നേതൃത്വത്തിൽ ഗുരുവായൂർ-തിരുനാവായ റെയിൽ പാത നിർമ്മാണം ആരംഭിക്കണമെന്ന് ആവശ്യപ്പെട്ട് കേന്ദ്ര റെയിൽവേ വകുപ്പ് മന്ത്രിക്ക് സമർപ്പിക്കുന്ന ഭീമ ഹർജിയിലേക്കുള്ള ഒപ്പ്‌ശേഖരണത്തിന്റെ ഉദ്ഘാടനം നിർവഹിക്കുകയായിരുന്നു അദ്ദേഹം. കേരളത്തിലെ റെയിൽവേ മേഖലയിലെ പോരായ്മകൾ പരിഹരിക്കുന്നതിനും റെയിൽവേ സ്റ്റേഷനുകളുടെ വികസനത്തിനും ഗുരുവായൂരിലേക്ക് കൂടുതൽ ട്രെയിനുകൾ അനുവദിക്കുന്നതിന് ഒറ്റക്കെട്ടായി ശ്രമിക്കണം. തിരുനാവായയിലേയ്ക്കുള്ള റെയിൽപാത നിർമ്മാണം ആരംഭിക്കുന്നതിനോടൊപ്പം ഗുരുവായൂർ പൂങ്കുന്നം പാതയിൽ നിന്ന് വടക്കാഞ്ചേരിയിലേക്കുള്ള റെയിൽവേ പാത നിർമ്മാണത്തിനുള്ള സാദ്ധ്യത കൂടി പരിശോധിക്കണമെന്നും എം.എൽ.എ ആവശ്യപ്പെട്ടു. ദൃശ്യ പ്രസിഡന്റ് കെ.കെ. ഗോവിന്ദദാസ് അദ്ധ്യക്ഷത വഹിച്ചു. നഗരസഭ ചെയർമാൻ എം. കൃഷ്ണദാസ്, പ്രതിപക്ഷ നേതാവ് കെ.പി. ഉദയൻ, മമ്മിയൂർ ദേവസ്വം ചെയർമാൻ ജി.കെ. പ്രകാശ്, ദൃശ്യ സെക്രട്ടറി ആർ. രവികുമാർ, ട്രഷറർ വി.പി. ആനന്ദൻ എന്നിവർ പ്രസംഗിച്ചു.