വടക്കാഞ്ചേരി: സ്വാതന്ത്ര്യത്തിന്റെ അമൃത മഹോത്സവവുമായി ബന്ധപ്പെട്ട് വടക്കാഞ്ചേരി ഗവ. ഗേൾസ് ഹൈസ്‌കൂൾ വിദ്യാർത്ഥികൾ ആഗസ്ത് 10 ന് സാമൂഹിക ശാസ്ത്ര ക്ലബ്ബിന്റെ ആഭ്യമുഖ്യത്തിൽ തയ്യാറാക്കിയ ദേശഭക്തി മുദ്രാവാക്യങ്ങളുടെ ബാനർ 'ബെസ്റ്റ് ഒഫ് ഇന്ത്യ'യുടെ റെക്കോർഡ് ബുക്കിൽ ഇടം നേടി. സ്വാതന്ത്ര്യ സമരകാലത്ത് ദേശീയ നേതാക്കൾ ഉയർത്തിയ പ്രശസ്തമായ മുദ്രാവാക്യങ്ങൾ മലയാളം, തമിഴ്, ഹിന്ദി, സംസ്‌കൃതം, അറബിക്, ഇംഗ്ലീഷ്, ഫ്രഞ്ച്, സ്പാനിഷ്, ജാപ്പനീസ്, കൊറിയൻ, തായ്, ചൈനീസ് തുടങ്ങി 12 വ്യത്യസ്ത ഭാഷകളിൽ നാല് നിറങ്ങളിലുള്ള പേനകൾ ഉപയോഗിച്ച് തുണിയിൽ എഴുതിയാണ് വിദ്യാർത്ഥികൾ ഈ ബാനർ തയ്യാറാക്കിയത്. സാമൂഹിക ശാസ്ത്ര ക്ലബ്ബിന്റെ ആഭിമുഖ്യത്തിൽ നടന്ന ഈ പ്രവർത്തനത്തിന് അദ്ധ്യാപകനും സാമൂഹിക ശാസ്ത്ര കൗൺസിൽ ജില്ലാ സെക്രട്ടറിയുമായ കെ.പി. സജയൻ, ക്ലബ് ലീഡർ എ.എ. ഹസ്‌ന എന്നിവരാണ് നേതൃത്വം നൽകിയത്. ആഗസ്ത് 10ന് സ്‌കൂളിൽ ഉണ്ടായിരുന്ന 728 വിദ്യാർത്ഥികൾ ചേർന്ന് 90 മിനിറ്റ് സമയം കൊണ്ടാണ് 88 ചതുരശ്ര അടി വിസ്തീർണമുള്ള ഈ ബാനർ തയ്യാറാക്കിയത്. ഓണം അവധിക്ക് ശേഷം ജില്ലാ ആസ്ഥാനത്ത് നടക്കുന്ന ചടങ്ങിൽ വിശിഷ്ട അതിഥികളുടെയും ജനപ്രതിനിധികളുടെയും സാന്നിദ്ധ്യത്തിൽ റെക്കാഡ് സാക്ഷ്യപത്രവും ബാഡ്ജും വിദ്യാർത്ഥികളും അദ്ധ്യാപകരും ചേർന്ന് ഏറ്റുവാങ്ങും.