തിരുവനന്തപുരം: ജില്ലയിൽ കണ്ടെത്തിയ 7,278 അതിദരിദ്ര കുടുംബങ്ങൾക്ക് മൈക്രോ പ്ലാൻ തയ്യാറാക്കുന്നതിനുള്ള പരിശീലനം കിലയുടെ നേതൃത്വത്തിൽ തുടങ്ങി. ജില്ലാപഞ്ചായത്ത് പ്രസിഡന്റ് ഡി.സുരേഷ് കുമാർ ഉദ്ഘാടനം ചെയ്തു. അഞ്ച് വർഷത്തിനകം ജില്ലയിൽ നിന്ന് അതിദാരിദ്ര്യം നിർമാർജനം ചെയ്യുകയെന്ന ലക്ഷ്യത്തോടെ സമഗ്ര പരിപാടികൾ തയ്യാറാക്കുന്നതിനായാണ് പരിശീലനം. ജില്ലയിലെ തദ്ദേശഭരണ സ്ഥാപനങ്ങളിലെ അദ്ധ്യക്ഷന്മാരും സെക്രട്ടറിമാരും പങ്കെടുത്തു. വരും ദിവസങ്ങളിൽ വിവിധ വകുപ്പ് ഉദ്യോഗസ്ഥർക്കും റിസോഴ്‌സ്‌പേഴ്‌സൺമാർക്കും മൈക്രോ പ്ലാൻ തയ്യാറാക്കുന്നതിനുള്ള പരിശീലനം പഞ്ചായത്ത് അസോസിയേഷൻ ഹാളിൽ നൽകുമെന്ന് ജില്ലയിലെ ജനകീയാസൂത്രണം ഫെസിലിറ്റേറ്റർ സുഭാഷ് ചന്ദ്രൻ അറിയിച്ചു. പരിശീലന പരിപാടിയിൽ റിസോഴ്‌സ്‌പേഴ്‌സൺമാർക്ക് പുറമെ തദ്ദേശ സ്വയംഭരണ വകുപ്പ് ജില്ലാ ജോയിന്റ് സെക്രട്ടറി ബിനു ഫ്രാൻസിസ്, ജില്ലാ ദാരിദ്ര്യ ലഘൂകരണ യൂണിറ്റ് പ്രോജക്‌ട് ഡയറക്‌ടർ വിജയ കുമാർ എന്നിവരും സംസാരിച്ചു.