കടയ്ക്കാവൂർ:പരിസ്ഥിതി സംരക്ഷണ സന്ദേശമുയർത്തി കടയ്ക്കാവൂർ സ്വദേശിയും സംഘവും ആരംഭിച്ച ഇന്ത്യൻ പര്യടനം പൂർത്തിയാക്കി. പരിസ്ഥിതി സംരക്ഷണത്തിനായി ഒരു മരം നടൂ, ഒരായിരം പക്ഷികൾക്ക് കൂടൊരുക്കാം എന്ന സന്ദേശമുയർത്തിയാണ് കഴിഞ്ഞ ജൂലായ് 2ന് കന്യാകുമാരിയിൽ നിന്ന് പര്യടനം ആരംഭിച്ചത്.

കടയ്ക്കാവൂർ സ്വദേശി റോയ് പ്രഭാകരനും സംഘവുമാണ് പരിസ്ഥിതി സംരക്ഷണ സന്ദേശവുമായി ലഡാക്കിലേയ്ക്ക് ബുള്ളറ്റിൽ യാത്ര തിരിച്ചത്. കൊല്ലം ഡിസ്ട്രിക്ട് റോയൽ എൻഫീൽഡ് യൂസേഴ്സ് ക്ലബിന്റെ നേതൃത്വത്തിൽ റോയൽ എൻഫീൽഡ് കമ്പനിയുടെ സഹകരണത്തോടെയാണ് ഒരുമാസം നീണ്ടുനിന്ന പര്യടനം സംഘടിപ്പിച്ചത്.

അനവധി ബൈക്ക് റൈഡുകൾക്ക് സംഘാടകനായ റോയ് കടയ്ക്കാവൂരാണ് പര്യടനത്തിന് നേതൃത്വം നൽകിയത്.ക്ലബ് അംഗങ്ങളായ മൂന്ന് വനിതകൾ ഉൾപ്പെടെ 14 പേരാണ് ഒരു മാസം നീളുന്ന യാത്രയിൽ പങ്കെടുത്ത് പര്യടനം പൂർത്തിയാക്കിയത്. ഇന്ത്യയിലെ എല്ലാ സംസ്ഥാനങ്ങളിലൂടെയും കടന്നുപോയ പര്യടനം ഓരോ സംസ്ഥാനത്തും തൊട്ടുമുൻപ് സന്ദർശിച്ച സ്ഥലത്ത് നിന്നുള്ള ഒരു വൃക്ഷത്തെ നടുകയും ചെയ്തിരുന്നു.ലഡാക്കിലെ ഏറ്റവും ഉയർന്ന സ്ഥലമായ കർത്തുംഗ് ലാപാസ് സന്ദർശിച്ച് തിരികെ സംഘം കൊല്ലത്ത് എത്തി. 10 ബുള്ളറ്റുകളിലും രണ്ട് ഹാർലി ഡേവിഡ്സൺ ബൈക്കുമാണ് പര്യടനത്തിന് ഉപയോഗിച്ചത്.