തിരുവനന്തപുരം: കേരള റിപ്പോർട്ടേഴ്‌സ് ആൻഡ് മീഡിയ പേഴ്‌സൺസ് യൂണിയൻ(കെ.ആർ.എം.യു) ജില്ലാ കമ്മിറ്റി അംഗങ്ങൾക്കായുള്ള സൗജന്യ നേത്ര പരിശോധന 30 വരെ നടക്കും. ശ്രീനേത്ര കണ്ണാശുപത്രിയുമായി സഹകരിച്ചാണ് പദ്ധതിയുടെ ആദ്യ ഘട്ടം നടപ്പാക്കുന്നത്. അംഗത്തിനുൾപ്പടെ കുടുംബത്തിലെ നാലുപേർക്കാണ് ആനുകൂല്യം ലഭിക്കുക. കണ്ണിലെ പ്രഷർ, തിമിര നിർണ്ണയം, പ്രമേഹം മൂലമുള്ള കാഴ്ച വൈകല്യം എന്നിവയുടെ പരിശോധനയും കണ്ണടക്ക് പ്രത്യേക കിഴിവും ലഭിക്കും. രണ്ടാം ഘട്ടമായി സൗജന്യ ഹൃദ്രോഗ പരിശോധനയുമുണ്ടാകുമെന്ന് ജില്ലാ പ്രസിഡന്റ് കൃഷ്ണകുമാർ പറഞ്ഞു. ക്ഷേമ നിധി,ഇൻഷ്വറൻസ് എന്നിവ എല്ലാ അംഗങ്ങളിലേക്കും എത്തിക്കുന്നതിനായി ഓരോന്നിനും സബ് കമ്മിറ്റികളും രൂപീകരിച്ചു. 2023 ലേക്കുള്ള അംഗത്വം പുതുക്കൽ അംഗത്വം ക്യാമ്പയിൻ എന്നിവയ്ക്ക് ഒക്ടോബറിൽ തുടക്കമാകുമെന്നും ഈ കാലയളവിൽ കേന്ദ്ര സംസ്ഥാന സർക്കാർ ആനുകൂല്യങ്ങൾ ലഭ്യമാക്കാനുള്ള നടപടികൾ ആരംഭിക്കുമെന്നും കെ.ആർ.എം.യു ട്രേഡ് യൂണിയൻ സംസ്ഥാന ട്രഷറർ ഡി.ടി. രാഗീഷ് രാജ പറഞ്ഞു. കെ.ആർ.എം.യു ട്രേഡ് യൂണിയൻ തിരുവനന്തപുരം ജില്ലാ ജനറൽ സെക്രട്ടറി ഷെരീഫ്.എം.ജോർജ്,കമ്മിറ്റി അംഗങ്ങളായ നിഖിൽ പ്രദീപ്,ഷിജി ശിവ,മലയിൻകീഴ് ബിജുകുമാർ,സന്തോഷ്,സതീഷ് കമ്മത്,മോഹൻദാസ്,ഡോ.പ്രേം കുമാർ,മനോജ്, ഉദിയൻകുളങ്ങര അനിവേലപ്പൻ,ബിവിൻ കുമാർ തുടങ്ങിയവർ സംസാരിച്ചു.