കല്ലമ്പലം: കല്ലമ്പലം മത്സ്യമാർക്കറ്റിൽ ഭക്ഷ്യസുരക്ഷാ ഉദ്യോഗസ്ഥർ നടത്തിയ പരിശോധനയിൽ 120 കിലോ പഴകിയ ചൂര മീൻ പിടികൂടി. പഴകിയ മത്സ്യം നിരന്തരമായി മാർക്കറ്റിൽ വില്പന നടത്തുന്നുവെന്ന വിവരം ലഭിച്ചതിന്റെ അടിസ്ഥാനത്തിൽ വിവിധ സർക്കിളുകളിലെ ഭക്ഷ്യസുരക്ഷാ ഉദ്യോഗസ്ഥരുടെ മേൽനോട്ടത്തിൽ നടത്തിയ പരിശോധനയിലാണ് പഴകിയ മത്സ്യം പിടികൂടിയത്. പിടികൂടിയ മത്സ്യം നശിപ്പിക്കുന്നതുൾപ്പെടെയുള്ള നടപടികൾ ഉദ്യോഗസ്ഥർ സ്വീകരിച്ചു. അടുത്തകാലത്തായി വിവിധ സ്ഥലങ്ങളിൽ പഴകിയ മത്സ്യം എത്തുന്നത് ജനങ്ങളിൽ ഭീതി പരത്തുന്നുണ്ട്.ഉദ്യോഗസ്ഥരുടെ പരിശോധന കൃത്യമായി തുടരണമെന്ന് നാട്ടുകാർ ആവശ്യപ്പെട്ടു.